PJAK’yî hêrişê rejîmê Îranî yê serê Komeleya Zehmetkêşan bi şîdet şermezar kerd û keyeyanê şehîdan û şarê Kurdîstanî rê serweşîye waşte. PJAK’yî dîyar kerd ke no hêriş reyna muhîmîya yewîya neteweyî û têkoşînê hempar ê vera sîyasetanê dîktatorî û terorîstî nîşan dano.
Meclîsê Partîya Cuya Azade ya Kurdîstanî (PJAK) derheqê hêrişê rejîmê Îranî yê serê Komeleya Şorişgêrî ya Zehmetkêşanê Kurdîstanî û Îran de eşkerayîyêka nûştekî vila kerde. PJAK’yî hêrişê serê Komeleya Zehmetkêşan bi şîdet şermezar kerd û keyeyanê şehîdan û şarê Kurdîstanî rê serweşîye waşte.
Eşkerayîya PJAK’yî wina ya:
“Hêrişê fuzeyan yê hovane yo ke no sodir de hetê dewleta Îranî ra serê kampanê Komeleya Şorişgerî ya Zehmetkêşanê Kurdîstanî û Îranî yê nêzdîyê Zirgiwêze de ame kerdene, netîceyê herişî de 9 pêşmergeyê Komela şehîd bîyî. Ma sey Meclîsê Partîya Cuya Azade ya Kurdîstanî nê hêrişê terorîstî bi şîdet şermezar kenî û keyeyanê serberzan ê nê 9 şehîdan û pêro şarê Kurdîstanî rê serweşîye wazenê.
Na çalakîya terorîstî ke dewamê sîyasetê qirkerdişê şarê Kurdî yo, nîşaneyê tersê xorînî yê rejîmî yo ke vera îradeyê azadîwazî yo. Gonîya nê 9 pêşmergeyanê ke nê hêrişê hovane de canê xo feda kerd, reyna muhîmîya yewîya neteweyî û têkoşînê hempar ê vera sîyasetanê dîktatorî û terorîstî yê rejîmê Komara Îslamî nîşan dano.
Tewlê hemxemê ma yê xorînî yê seba nê felaketî, ma îlan kenê ke rayîrê azadîya Kurdîstanî bi gonîya şehîdan geştir bena û xebata meşrû ya şarê ma heta serkewtene qetî do dewam bikero.”
