Endamê Fermandarîya NPGyî Murat Karayilanî dîyar kerd ke bi sebebê şertanê şerê giranî, nêbîyayîşê asayîşê têkilîyan û herêmanê îşxalkerdeyan firsend nêda ke cinazaya zafîya şehîdan eşkera bikerê.
Endamê Fermandarîya Merkezê Pawitişê Şarî (NPG) Murat Karayilanî ANFyî rê derheqê şehadetan de ke rojanê peyênan de ameyî resnayene, qisey kerd.
Karayilanî îfade kerd ke 520 şehîdê Vakurê Kurdîstanî do bêrê resnayene û parçeyanê bînan de zî şehîdê ke nêameyî resnayene, est ê. Karayilanî vat 1976î ra heta 2026î 25 hezar û 922 şehîdî ameyî qeydkerdene û êyê ke nêameyî qeydkerdene pîya hûmare nizdîyê 27 hezaran a. Karayilanî vat zafîya cinazeyan binê kontrolê înan de ya.
Karayilanî bale ante metodê têkoşînê neweyî ser o: “Ma qonaxa şerê çekdarî ra vîyarenê qonaxa têkoşînê komelkî. Ma stratejîya şerê çekdarî ca verda, la ma têkoşîn nêverda.”
Karayilanî derheqê şehîdan de vat: “Vatişê Rayber Apoyî ‘PKK partîya şehîdan a’ heqîqetêk ano ziwan. Têgêrayîşê ma şehîdan reyde ame awankerdene, bi şehîdan rayîr şî û bi şehîdan gird bî. Tarîxê komelan de komelê ke qehremanê xo awan nêkerdî, vila bîyî, çin bîyî. Ma tu wext şehîdanê xo sey vindîkerdişî nêgênê xo dest; Rayber Apoyî zî tu wext wina nêerjnayo.”
Karayilanî vat şehîdî çimeyê hêz û ruhê têkoşînî yê: “Keyeyêk de birayêk şehîd bî, waye herinda ci de tewrê têkoşînî bîye. Coka Têgêrayîş bî têgêrayîşêko nênusîyaye û qonaxanê tewr zehmetan ra vîyart.”
Karayilanî derheqê ereykerdişê resnayîşê şehadetan de vat: “Ma des serranê peyênan de bi hemleyêka çinkerdişî reyde rî bi rî mendî. Wexto ke şerî dewam kerd, ma mecbûr mendî ke seba asayîşê hevalan sîstemê têkilîye bivindarnê. Coka şehadetê xeylê hevalan erey resayî qerargehî. Ma hêvî kenê ke keyeyê ma yê erjîyayeyî naye fehm bikerê.”
Karayilanî vat qerarê Kongreya 12. ya PKKyî ra yew îlankerdişê şehîdan bî ke heta nika nêameybî îlankerdene: “Reya verên a ke ma şehîdanê xo bi komî resnenê. 1976î ra heta 1983î 173 şehîdî; 1984î ra heta 2000î 13.778; 2001î ra heta 2026î 7.949 şehîdî. Şehîdê YPSyî 760 ê. Şerê vera DAÎŞî de, Kobanê, Rojawan û Şingal de 3.262 şehîdê ma est ê.”
Karayilanî vat 99 şehîdanê ci endamîya Komîteya Merkezî ya PKKyî kerda: “Şehîdanê ma yê pêşengan de sere de Hakî Karer est o; Rayber Apoyî ci rê vat ‘ruhê min o nimite’. Peyên de zî heval Alî Haydar Kaytan o. Mabênê nê her di şehîdan de Riza Altun, Sakîne Cansiz, Kemal Pîr, Hayrî Durmuş, Mazlûm Dogan, Ferhat Kurtay, Egîd (Mahsûm Korkmaz), Nûrettîn Sofî û Delal Amed est ê.”
Karayilanî vat ê wazenê heme şehîdanê xo şehîdgehan de kom bikerê: “Dewleta tirke şehîdê ma nimitêne, remnayêne. Heta Garzan de esteyê şehîdanê ma vetî, berdî Kilyosê Îstanbulî. Wazenê ke tarîx vindî bibo. Nika ke prosesê haştîye est o, ganî vîyarteyê tu kesî nêro qedexekerdene. Ma wazenê Şêx Seîd, Seyîd Riza û şehîdê Newala Zîlanî zî tede, heme şehîdanê xo kom bikerê.”
Karayilanî vat ganî yadkerdiş bibo bingeyê hemleyêka newîye ya rêxistinbîyayîşî: “Şehîdanê ma nêwaştêne ke ma înan dima bibermê. Ganî ma xeyalanê înan bîyarê ca û her ca de komunanê demokratîkan awan bikerê.”
Karayilanî hişyarî daye ke hetê ke nêwazenê proses ser bikewo est ê: “Hem Tirkîya de hem hetê kurdan de kesê ke wazenê prosesî xirab bikerê est ê. Nika bi nameyê notanê pêdîyayîşanê Îmralîyî wazenê parazît û texrîbat bikerê. Ganî şarê ma goşdarîya nê kesan nêkero.”
Karayilanî peynî de vat: “Ma deyndarê nê şehîdanê qehremanan ê. Ma do dawaya înan biresnê serkewtişî û wina înan nemir bikerê. Ma 53 serrî yo têkoşîn danê; 41 serrî şerê çekdarî ame rayraberdene. Nika ma qonaxêka newîye de yê û ma do bi metodanê sîyasî, çarçewaya huqûqî de têkoşînî biramê. Paradîgmaya ma tena seba Kurdîstanî ney, seba Tirkîya, herême û dinya ya. Şehîd Namirin, Şehîd Namirin.”
