Badê hêrişanê Amerîka yê serê Îranî, herêm de îhtîlafî hîna zêdeyêr bîyê. Dimayê êrişanê Îranî yê serê Bahreyn, Qatar, Umman û Urdunî de zafê welatan de hişyarîye ameye dayene.
Dimayê ke Amerîkayî Îran de da zaf hedefan ro, hêrişê cewabdayenê yê Îranî vera welatanê Kendawe vila bîyê. Seba hêrişanê serê Bahreyn, Qatar, Umman û Urdunî, tedbîrê ewlekarî ameyê zêdekerdene.
Goreyê ajansê xeberan ê resmî yê Ummanî ONA ra, tayê nuqteyê wilayetê Musandamî yê vakurê welatî, biyê hedefê teyaranê bêmerdiman.
Rayberîya Ummanî hêriş şermezar kerd û eşkera kerd ke seba garantîya ewlekarîya welat û welatijan, pêro tedbîrê ke lazimê ameyê girewtene.
Qatar de 3 kesî birîndar biyê
Wezareta Karê Zereyî ya Qatarî eşkera kerd ke seba kewtişê parçeyanê fuzeyanê Îranî yê ke hetê sîstemê pawitişê hewayî ra ameyê astengkerdene, 3 kesî birîndar bîyê ke inan ra yew tira doman bîyo. Rayedaran dîyar kerd ke birîndarî berdê nêweşxane seba tedawîkerdene û unîteyê ewlekarî û pawitişê sivîlî prosedurê rewşa lezgîne vistê dewrê.
Bahreyn de raya hîrêyine alarm ame dayene
Wezaretê Karanê Zereyî ya Bahreynî eşkera kerd ke mîyanê rojî de 3 rey sîrenê hêrişê hewayî ameyî cinitene. Rayedaran veng da şarî ke wa aram bê û şêrê sitargehanê tewr nêzdîyan.
Urdun: Îran ra 3 fuzeyî ameyî eştêne
Artêşa Urdunî eşkera kerd ke 3 fuzeyê ke Îran ra ameyê eştêne, serê sibayî kewtê herêmanê cîya-cîyayanê welatî. Goreyê daneyanê verênan, hêrişan de zayîatê canî çin o. Çimeyanê leşkerî dîyar kerd ke ê rayîr nêdanê ke warê hewayî ya Urdunî û herêma înan bibo warê şerê herêmî û eşkera kerd ke vera her tewir tehdîdî yê serê serwerîya welatî, ê do bi tewirêko ‘biqerar’ cewab bidê.
Hurmuz de keştîya ke hêriş ser o amebî kerdene de hemwelatîyê Hindistanî zî tede bîbî
Wezaretê Karanê Teberî yê Hindistanî dîyar kerd ke keştîya ke Neqebê Hurmuzî de hêriş ser o amebî kerdene, tede 11 hemwelatîyê Hindîstanî bîbî.
Eşkerayî de ame vatene ke 10 kesî ameyê xelasnayene û kesêke zî vîndî bîyo.
