Têhetameyîşê şarj yê Gimgimî de seba ke dewlete hema gamî nêeştî nêrazîbîyayîş ame mojnayene û ame vatene ke seba caardişê haştîye gerek Rayber Apo bibo azad.
Çarçeweya têhetameyîşanê şarî ke bi şîarê “Ma bi şarî qala haştîye kenê” hetê Partîya Herêmanê Demokratîkan (DBP) ra yenê kerdene de Gimgimê Mûşî de kombîyayîş ame organîzkerdene. Hemsereka Pêroyî ya DBPyî Çîgdem Kiliçgun Uçare û Wekîla DEM Partî ya Mûşî Sumeyya Boze tewrê kombîyayîşî bîyî
Verî hemwelatîyê ke dewa Xwarike ya Gimgimî de vera projeyê JESî nobete tepişenê ameyî zîyaretkerdene. Çîgdem Kiliçgun Uçara ke tîya qisey kerd, çalakîya nobete selam kerd û vat şarê kurdî têna seba ziwan, nasname û kulturê xo ney, seba pawitişê xozaya xo zî têkoşîn keno. Summeye Boze zî ard ziwan ke têkoşînê ekolojî yê Gimgimî têkoşînê înan o vat ê do pêro pîya xover bidê.
Heyetê DBPyî dima ra dewa Reqasanî de şarî de ame têhet. Rixmê varayîşî xeylê kesî tewrê kombîyayîşî bîyî. Sumeyye Boze vat: “Muxatabê nê prosesî est o. Prosesê haştîye bi Abdullah Ocalanî yeno rayraberdene. Dewlete samîmî nîya. Keso ke na haştîye ano Rayber Apo yo.”
Çîgdem Kiliçgun Uçare zî ard ziwan ke proses têna bi çekronayîşî sînordar nîyo û nê vat: “PKKyî çeke xo veşnayî, hêzê xo peyser antî û vat ‘Ma do şerî biqedînê, şima zî temînatê huqûqî bidê ma’ la seba ke çekî ameyî ronayene senî ke her çî biqedîyo. Gerek heqê ma qanûnî bêrê pawitene. Bawerîya ma AKPyî ra çîn a la muzakerêk est o. Na têna meseleya AKP ya zî dewlete nîya. Têkoşînê şarî do azadîya û haştîye bîyaro nê welatî.”
Çarçewaya têleweameyîsanê sarî yê ke Gimgim de yena ramitene de dîyarê dewa Qeremeşî de zî yew kombîyayîş ame kerdene û serê polîtîkayanê înkarî ya seserre, persa estbîyayîsî û awankerdisê ameyoxî sero ame qisey kerdene.
Yew kombîyayiş zî Taxa Kulturî ya Gimgimî de ame viraştene. Nê kombîyayişî de zî persa kurdan, têkoşîno hempar û îklîmê sîyasî sero ame qiseykerdene.
Hemwelatîyan ke kombîyayîş de qisey kerd, înan zî vat gerek zemîno demokratîk bêro xurtkerdene û pêvînayîşê bi Rayber Apoyî newe ra bêrê destpêkerdene.
