Riha- Fermandaranê YPJ’yî ra Mîlîtan Efrîne dîyar kerd ke zîhnîyeto îqtîdar wazeno artêşbîyayîşê cinîyan perçe bikero û îfade kerd ke ê do destkewteyanê xo yê ke bi keda têkoşînê serran a ra fek veranêdê û wina vat: “Eke sîstemêko ke na nasname nas nêkero, şarê ma zî do ey nas nêkero. Coka YPJ tena nameyêk nîyo, pratîk û plankerdişê cuye yo.”
Peymana 29ê çileyî ke mabênê Hêzanê Sûrîyeya Demokratîke (HSD) û Hukmatê Demkî yê Sûrîye de amebî îmzekerdene, ser o nêzdî 7 aşmî vîyart. Her çiqas seba entegrasyonî hetê ewleyî, leşkerî, rayberî û koçberîye ra tayê gamî amebê eştene zî, madeyê esasî yê peymane hema zî nêameyê caardene. Sewbîna hetê sazgehanê rayberî ra zî tayê averşîyayîşî virazîyê û her çiqas prosesê entegrasyonî sazgehanê rayberîye gîran rayra şêro zî, dewam keno; la estbîyayîşê Yewîneyanê Pawitişî yê Cinî (YPJ) hema zî hetê Hukmatê Demkî yê Sûrîye ra nêna qebûlkerdene. Nêqebûlkerdişê YPJ’yî mîyanê artêşa newe de, sere de cinîyanê kurdan, hetê heme cinîyan ra raştê nêrazîbîyayîşêko huşk ame û cinî vanê ke nêqebûlkerdişê YPJ’yî, nêqebûlkerdişê nasnameyê cinîyan o.
Derheqê na babete de fermandara YPJ’yî Mîlîtan Efrîne ajansê ma (AW) rê qisey kerd.
‘Pêameyîş nêno manaya xohelênayîşî’
Fermandara YPJ’yî Mîlîtan Efrîne dîyar kerd ke no proses, demêko derg o ke rewşa sîyasî û leşkerî ya herêmî ver rojev de yo û seba aramîyêka domdar xeylî pêvînayîşî virazîyê.
Mîlîtan Efrîne bale ante bîngeyê pêameyîşî ser û wina vat: “Badê şerêko giran, derg û çetin, prosesê pêameyîşî ke sey peymanêke yeno rayraberdiş, dest pêkerd. Cehdkerdişê ma no yo ke ma Sûrîyeyêka demokratîk a ke heme unsuran mîyanê xo de hewênena, awan bikerê. Pêameyîş tarzêko ke şar bieşko warê qanûnî û asayî de xo bi xo îdare bikero. Eke mîyanê dewelete de munaqeşeyêk bibo, ganî çarçewaya peymane de qanûnî bingeyê heq û seyyewbînî de bêrê caardene ke estbîyayîş, reng û vengê ma tede bibo. Pêameyîş nêno na manaya ke ti xo mîyan ê bînan de bihelênê, bibê wayîrê şexsîyetêko bêîrade, yan zî sey verê rêza dîyine de bimanê. Eksê cî, pêameyîş no yo ke îradeyê to, statuyê to û ziwanê to bibo fermî û bi qanûnî bêrêî naskerdene.”
‘Rayberîya ke nika esta îşxalkerdişî teberî ra akerdeya’
Mîlîtan Efrîne qiseyê xo de bale ante kêmasîyanê rayberîya Şamî ser û îşxalkerdişî teberî û dîyar kerd ke cehdkerdişê înan seba pawitena seyyewbînîya heme neteweyan a û vat: “Rayberîya ke esta, wayîrî tecrubeyêke nîya ke bizano ke pêameyîş çi yo; qewetê înan ê îdarekerdişî kêm o. Cehdkerdişê ma no yo ke peymanêka ke xizmeta şarî de awan biba. Wexto merdim nê prosesî erjneno, astengîyanê girdan vîneno. Sîstem yan zî rayberîya ke nika îqtîdar a, nê prosesî zaf gîran rayra bena. No proses bi îrade û ewnîyayîşê înan ê xoser rayra nêşino; sîstemêko zaf hetin o û xeylê hêzê ke teber ra yê mîyanê sîstemê Sûrîye de yê. Nê îşxalkerdişê teberî ra proses hîna giran beno.”
‘YPJ hevsencîya dinya vurna’
Fermandara YPJ’yî ard vîr ke wextê krîzê Sûrîye de şerêko zaf giran qewimîya û ters û xofê ke DAIŞ’î vila kerdbi tesîrî heme dinya kerdbi û nê şerî çetîn de qalê rolê YPJ’yî kerd û wina vat: “Hêrişê DAIŞ’î yê Rojavayê Kurdîstanî ser, hêrişêko asayî nêbi; planêko gird ê wayîrê îdeolojîyêka teberê exlaqê merdîmîye de bi. DAIŞ wexto ke ame, sey hêzêko zaf bi sîstem û hov ame asayîş; vera nê tecrubeyê ke YPJ’yî mîyanê serran de dest kerd, heme hemsecîya dinya vurna. Rolê YPJ’yî tîya de rihêko xurt o ke bi bawerîyêka gird, bi vindertişêko xoser û bi îradeya heyf girewtene vera hovitîye vindert, vete vernî. Merdim nêeşkeno rolê YPJ’yî tena sey hêzêko leşkerî yo asayî bierjno; hêzê YPJ’yî vengê xo resna heme dinya.”
Pênaseyê cinîya azad û cewabê vera zîhnîyetê patrîarkalî
Fermandara YPJ’yî Mîlîtan Efrîne eşkera kerd ke nameyê YPJ’yî dinya de semedê pratîk û serkewtişê xo yê raştî bîyo emsal û îfade kerd ke cinîyan wexto ke hêza YPJ’yî dîyî, cesaretê înan hîna zêde bîyo û vera ferzkerdişê kanpersetî, sîstemê xo yê xopawitîşî awan kerd û wina domna: “Zîhnîyetê patrîarkal û kanperestî ke îrade, nasname û erjê cinîyan nas nêkeno, nêeşkeno pêşengîyê komelî demokratîk bikerê. Prosesê entegrasyonî zaf giran rayra şino, çunke no zîhnîyeto îqtîdar wazeno cinîyan tena sînoranê keyeyî de bigro. Goreyê nê zîhnîyetî, cinî tena keye de yê, ganî keye de girewte û bêveng bibê. Nêwazeno cinî bîbo wayîrê hêzêko leşkerî, nêwazeno sey artêşêke yewîya înan biquwet bo; tena bi hawayêko yewane û mîyanê sazgehanê cîyayan de qebûl kenê ke rengê înan vindî bibo. Ma nêeşkenê bi asanî destkewteyanê ke serran o bi ked û fedakarî ameyê awankerdene ra fek veradê. Vindertişê vera nê zîhnîyetî şerêko gir û têkoşînêke wazeno.”
‘Şar wayîrê YPJ’yî vejêno’
Mîlîtan Efrîne bale ante girêdayîşo xurt ê mabenê şar û YPJ’yî ser o û dîyar kerd ke komel resayo hişmendîyêka xorîn ke bi rayraşîyîş û mîtîngan piştî dano artêşê xo û wina vat: “Helwestê şarî ma hîna zêde kêfweş kerd û mîyanê ma de hêz û bawerîyêka hîna biquwet awan kerd. Nika şarê ma, taybetî cinîyê Vakur û Rojhelatê Sûrîye bi hişmendîyêka girde vanê ‘Eke Hukmatê Demkî yê Sûrîye nê prosesî de hêzê cinîyan nas nêkero, ma zî ey nas nêkenê.’ Komel bi eşkera vano ‘Eke YPJ nasnameyêk bo, o nasnameyê ma yo. Eke YPJ domanê ma bê, ma zî dayîk û pîyê înan ê.’ Ma hêzê pawitişê cinîyan ê; la pawitişê nê hêzî bi xo zî no komel û taybetî cinî kenê. Ma sey goşt û nenûg ê, yewbînan ra cîya nêbenî. Redkerdişê na îradeye hedê kesî nîyo.”
Seba heme cinîyanê Sûriye û dinya serbanêk
Sewbîna Fermandara YPJ’yî Mîlîtan Efrîne dîyar kerd ke têkoşînê cinîyan hîrê stunanê sereke ser o yo; nê zî organîzasyon, têkîlî û yewbînî girewtiş ê. Mîlîtan Efrîne vengdayîşê îtîfaqê girdî yê cinîyan kerd û qiseyê xo bi nê vatişan qedêna: “No waştiş û vengdayîş serbanêk o ke eşkeno heme cinîyanê Sûrîye yê heme unsuran sey elewî, durzî, kurd û ereban û reyna heme cinîyanê asta mîyanneteweyî de bîyoro têhetî û vengê înan bikero yew. Amanco tewr gird yê nê cehdkerdişî, pawitişê nê destkeweteyanê tarîxî yê ke bi serrano vera nê sîstemo înkarkedeyî ameyê qezenckerdene. Bi no hawa, silam û mesajê heskerdişê yo ke seba her cinîyêka wayîrê dewa yeno erşawitiş, beno bingeyê îtîfaqêko hîna gird; vengo ke ewro berz beno, seranserê dinya de veng dano.”
