Maya Endamê Heyetê Rayberîya KCKyî Mustafa Karasûyî, Xanê Karasû dewa Karapinarî ya qezaya Gurunê Sêwazî de bi hawayêko girseyî ameya definkerdene.
Maya Endamê Heyetê Rayberîya KCKyî Mustafa Karasûyî, Xanê Karasû 94 serrîya xo de vizêr Çanakkale de şîbî heqîya xo. Xanê Karasû 31ê temuze de neweşîya aye girane bîbî û aye berdebî Neweşxaneyê Perwerde û Cigêrayîşî yê Unîversîteya Çanakkale. Xanê Karasû 3yê tebaxe de neweşxaneyê ke tede derman bîyêne de cuya xo ra bîye.
Keyeyî cenazaya Xanê Karasû verê cû ard Cemxaneyê Pîr Sultan Abdalî yê qezaya Esenlerî ya Stenbolî. Tiya merasîmê cenaza virazîya û dima ra cenaza ver bi qezaya Gurunê Sêwazî ameye oxirkerdene.
Cenaza ewro resa dewa aye Karapinar a ke girêdayeya qezaya Gurunî ya. Dewe de merasimê cenaza ame viraştene. Parlamenterê DEM Partî Celal Firat, Ayten Kordu û rayberê DEM Partî, DBP, aktîvîstê TJA, temsîlkarê dezgehanê sivîlan û zaf welatijî tewrê merasîmê cenaza bîyî.
Badê wezîfeyanê dînî, cinîyan tabutê cenazaya Xanê Karasû na milanê xo ser û berde goristan. Cenazaya maye Xanê, goristanê dewe de kişta mezelê mêrdêyê aye Xidir Karasûyî de ameye definkerdene.
