Şirnex – Tirkîya bi maneyê “ewleyîye” kewtişê seyan dewanê başûrê Kurdîstanî qedexe kerdo û dewijê nê dewan nêşenê şêrê serê erd û warê xo. Şarê herême da zanayene ke hewldanê înan ê şîyayîşê dewanê xo bênetîce maneno.
Artêşa Tirkîya 40 serran ra zêdeyêr o bi hezaran dewanê Kurdan vêşnayî û veng kerdî. Taybetî dewanê ke vakûr û başûrê Kurdîstanî de yê ameyê vengkerdene û heta nika zî qedexeyê kewtişê nê dewan dewam keno. Başûrê Kurdîstanî de 40 serranê peyênan de 1000 ra zêdeyêr dewî ameyî vengkerdene, mîyanê wextî de tayê welatijî agêrayî dewanê xo zî, hema kewtişê 600 ra zêdeyêr dewan hetê Artêşa Tirke ra yeno astengkerdene.
Dewê înan serra 1996 ra nata qedexe yê
Ma bi telefonî resayî dewijanê dewanê Sileh, Êkmale, Rîsê, Silê û Nizorî ke serra 1996 de hetê Artêşa Tirke ra ameybî vengkerdene. Dewijan da zanayene ke înan zaf rey ceribna ke şêrê dewanê xo, la her wext rastê eskeranê Tirkî ê kampanê Mila Radê ameyê. Welatijan dîyar kerd ke wexto ke înan seba şîyayîşê dewanê xo muraceatê Şubeyê Eskerî yê Pêşmergeyan ê Zaxoyî kerd, la qet yew netîce bi dest nêvist.
Seba debare wazenê agêrê dewanê xo
Welatijan dîyar kerd ke verê ke dewê înan bêrê vengkerdene, bi hezaran kesan debara xo bi zîret û weykerdişê heywanan ê herêmî kerdêne û dewjiî wazenê ke seba şertanê ekonomîk ê şaristanan, agêrê dewanê xo û debara xo bikerê. Welatîyê ke seba ewleyîye nêwaşt nameyê xo bidê, vera helwestê rayedaranê başûrê Kurdîstanî reaksîyon nîşan da û va ke eke rayedarî heqê înan ê agêrayîşê dewan nêpawê, nê nika seba çi karî benê.
Maneya şerî nêmendo la reyna zî qedexeyî dewam kenê
Welatijî tewr peynî de bale ante serê Prosesê Aştî û Komelê Demokratîkî û vat ke yew proses mabênê Têgêrayîşê Azadîye û Tirkîya de rayîr ra şino. Welatijan da zanayene ke êdî herêma dewanê înan de maneyê şerî nêmendo, la hemverê nê de zî seba şîyayîşê dewan qedexeyî dewam kenê.
