Cagirê Serekwezîrê Kuba: “Dorpêçkerdişê enerjîye welatanê ma ser o bes nêbi, polîtîkaya cezakerdena vera heme şarê Kuba û tedayê ke her ke şino zêde benê, bi girdîya nê amborgoyî vejîyayê meydan.”
Hukmatê Kuba, eşkera kerd ke semedê cezayanê ekonomîk û dorpêçê ke DYA’yî welatê înan ser o ca ardo, zêdeyê 7 hezar konteynerê bazirganî ê barê werdî, derman û wasitayê enerjîye lîmananê mîyanneteweyan de ameyê vindarnayîş.
Cagirê Serekwezîrê Kuba Eduardo Martinez Perez-Oliva qiseyê xo yê Meclîsê Neteweyî yê îqtîdarê şarî yê paytextê Havana de, vera zêdebîyayîşê zextanê ekonomîk ê rayberîya Washîngtonê welatê înan ser o nêrazîbîyayîşê xo ard ziwan.
‘Peydakerdişê derman û enerjî yenê astegkerdene’
Eduardo Martinez Perez-Oliva dîyar kerd ke kargoyê ke bi rayanê qanûnî ameyê herînayene û goreyê qeydeyanê bazirganîya mîyanneteweyî ameyê şawitene, ameyê astengkerdene; Eduardo Martinez Perez-Oliva îfade kerd ke 7 hezarî ra zêdeyêr konteynirê ke seba sektoranê werd, awe, derman û enerjîye ê tewr muhîm ê, lîmananê Karayîbî de ameyê tepiştene yan zî sewqîyatê înan ameyê ereyfistene.
Eduardo Martinez Perez-Oliva bale ante zextanê DYA’yî yê Kuba ser o ke serê serre ra hetanî nika bi hawayêko sîstematîk zêde bîyê û wina vat: “Dorpêçkerdişê enerjîye welatanê ma ser o bes nêbi, polîtîkaya cezakerdena vera heme şarê Kuba û zextê ke her ke şino zêde benê, bi girdîya nê amborgoyî vejîya meydan.”
“Dorpêçkerdiş bi xo çalakîyêka şerî ya”
Wezîrê Karanê Teber ê Kuba Bruno Rodriguezî zî erjnayîşê xo de dorpêkerdişê DYA’yî sey “çalakîyêke şerî” pênase kerd û dîyar kerd ke bi nê polîtîkayan raşteraşt şarê Kuba yeno hedef girewtene.
Welatêko ke 6 serrî yo krîzê ekonomîye reyde têkoşîn keno; kêmbîyayena berardişî, enflasyono zêde, vidîbîyayena erjê pereyê milî, birîyayîşê ceyranî yê ke bîyê sey kronîk û astengîyê ke resnayîşê xidaya bingeyîn de vejîyê, cuya rojane ser o tesîrêko negatîf keno. Goreyê pisporanê ekonomîye ra tesîrê caardişanê teberî û problemanê zerreyî ver, ekonomîya Kubayî serra 2026î de bi nisbetê sera 7,2 kêm bena.
