Hacî Haykir ê ku piştî 32 salan ji girtîgehê derket li Cizîrê bi girseyî hat pêşwazîkirin. Haykir got ku girtiyên azadiyê li girtîgehê berxwedaneke bêhempa pêk tînin û got: “Heta Rêbertiya me azad nebe wê azadkirina girtiyan nîvco bimîne.” a
Hacî Haykirê di sala 1994an de li navçeya Cizîrê ya Şirnexê hatibû binçavkirin û Dadgeha Ewlehiyê ya Dewletê ya Erziromê cezayê muebedê lê birîbû. Haykir duh de ji Girtîgeha Burdurê hat berdan. Hacî Haykir îro hat warê xwe Cizîra Botan û bi girseyî hat pêşwazîkirin. Di merasîma pêşwazîkirinê de rêveberên TUHAD-DERê, DEM Partiyê, DBPê û gelek kes amade bûn. Di dema pêşwaziyê de bênavber dirûşmên wek “Bijî berxwedana Rojava” û “Bijî berxwedana zindanan” hatin berzkirin.
Di pêşwaziyê de Hevserokê DEM Partiyê yê Şirnaxê Ramazan Uysal axivî û got: “Çavê malbatê ronî. Hêvî dikim ku em rojeke nêz de Rêberê Gelê Kurd Abdullah Ocalan ji vir pêşwazî bikin. Hevalê Hacî û hevalên wî yên di girtîgehê de 32 sal e li ber xwe didin û stu netewandin.”
Parlamentera DEM Partiyê yê Şirnexê Newroz Uysal Aslan jî da zanîn ku bi hezaran girtiyên Kurd li zindanan li ber xwe didin û girtiyên Kurd îradeya xwe radestî zordaran kain. Uysal bixêrhatina Haci Haykir kir û got ku 32 sal ne hindik e.
‘Berxwedaneke mezin li girtîgehan heye’
Hacî Haykir jî axivî û diyar kiri ku li girtîgehan girtiyên siyasî berxwedaneke bêhempa dikin. Haykir da zanîn ku derketina wî kêfxweşiyek ji wî re çênekiriye û got: “Ji ber ku azadiya me ya fîzîkî ne azadî ye. Heta ku Rêberê me azad nebe, azadî tune ye. Rêberê me azad nebe hemû azadî nîvcomayîn e. Ez ê ji niha şûn ve ji bo layîqî gelê xwe bibim bixebitim.”
Merasîma pêşwaziyê bi berzkirina dirûşma “Bijî berxwedana zindanan” bi dawî bû.
