Merdimê Vîndîbîyayan û şubeyanê ÎHD’yî bi waştişê “Wa vîndîbîyayeyî bêrê dîyiş, kiştoxî bêrê muhakemekerdiş” Amed, Colemêrg û Êlih de çalakî viraşte. Înan aqubetê Mahmût Dogan, Îslam Bartin, Abdulhaluk Geylanî û Nîhat Aydoganî persa.
Sey her hewte no hewte zî Merdimê Vîndîbîyayan û şubeyanê ÎHD’yî bi waştişê “Wa vîndîbîyayî bêrê dîyiş, kiştoxî bêrê muhakemekerdiş” Amed, Colemêrg û Êlih de çalakî viraşte. Înan aqubetê Mahmût Dogan, Îslam Bartin, Abdulhaluk Geylanî û Nîhat Aydoganî persa û waşt ke kiştoxî bêrê muhakemekerdiş û cezakerdiş.
AMED
Merdimê Vîndîbîyayan û Şubeya ÎHD’yî ya Amedî çalakîya xo ya “Wa vîndîbîyayî bêrê dîyiş û kiştoxî bêrê muhakemekerdiş” hewteya 927. de verê Abîdeyê Heqê Cuye yê Parka Koşuyolu ya qezaya Rezanî ya Amedî de dewam kerde. Pawitoxê heqanê merdiman, endam û îdarekarê sazgehanê komelkîyan û merdimê vîndîbîyayan tewrê çalakîye bîyî. Çalakîye de fotografê kesanê ke ameyê vîndîkerdiş ameyî girewtiş.
Çalakîya nê hewte de aqubetê Mahmût Doganî ame persayîş ke 27ê teşrîna peyêne ya 1993î de vîndî bîbi û cenazeya ey serra 1995î de dewa Xeraba Sitîlî ya Qerejdaxî de ameybî dîyiş. Hîkayeya Mahmût Doganî hetê îdarekarê ÎHD’yî Yahya Polatî ra ame wendiş.
Dima Serekê Şubeya ÎHD’yî ya Amedî Ercan Yilmazî dîyar kerd ke dîyiş û eşkerakerdişê cenazeyanê vîndîbîyayeyan seba averşîyayîşê Prosesê Aştî û Komelê Demokratîkî zaf muhîm o û wina vat: “Serranê dergan o ma hadiseyanê vîndîkerdişê bi zorî û kiştişanê ke kiştoxê înan nêzanîyenê, persenê. Meşte roja vîrardişê Seyîd Riza ya. Seyîd Riza û embazê ey ameyî dardekerdiş, cenazeyê înan hetê dewlete ra ameyî vîndîkerdiş. Serekkomar Recep Tayyîp Erdoganî qiseykerdişêko zaf bi hêvî kerdbi, efî waştbi û soz dabi ke cayê mezelanê înan bêro eşkerakerdiş. La nê des serranê ke vîyartî de ma dî ke sozo ke ameyo dayîş, bica nêameyo. Wa vîr ra nêbo ke kiştişanê ke kiştoxê înan nêzanîyenê reyde do rî bi rî bîyayîş bibo.”
Badê qiseykerdişê Ercan Yilmazî eşkerayîye bi deqîqeyêk çalakîya roniştişî qedîya.
COLEMÊRG
Şubeya Komeleya Heqanê Merdiman (ÎHD) ya Colemêrgî û Merdimê Vîndîbîyayan çalakîya “Wa vîndîbîyayî bêrê dîyiş, kiştoxî bêrê muhakemekerdiş” hewteya 253. de Kuçeya Hunerî ya Geverî de viraşte. Çalakîya nê hewte de aqubetê Îslam Bartin û Abdulhaluk Geylanî ame persayîş ke mabênê 9-15ê teşrîna peyêne ya serra 2005î de merkezê Geverî de hetê polîsan ra ameybî kiştiş.
Eşkerayîye hetê hemsereka ÎHD’yî ya Colemêrgî Sîbel Çapraze ra ame wendiş. Eşkerayîye de ame dîyarkerdiş ke 21 serrî yo kiştoxê Îslam Bartin û Abdulhaluk Geylanî nêameyê muhakemekerdiş.
Eşkerayîye bi deqîqeyêk çalakîya roniştişî qedîya.
ÊLIH
Merdimê Vîndîbîyayan û îdarekarê Şubeya Komeleya Heqanê Merdiman (ÎHD) ya Êlihî hewteya 763. de çalakîya “Wa vîndîbîyayî bêrê dîyiş û kiştoxî bêrê muhakemekerdiş” verê Abîdeyê Heqanê Merdiman ê Cadeya Gulistanî de viraşte. Çalakîya nê hewte de aqubetê Nîhat Aydoganî ame persayîş ke teşrîna peyêne ya 1994î de dewa Mizîzexî ya qezaya Midyadî ya Mardînî de hetê cendirmeyan ra ameybi remnayîş û a roje ra nat ey ra tu agahî nêameya girewtiş.
Îdarekar û endamê ÎHD’yî, merdimê vîndîbîyayan û zaf kesî tewrê çalakîye bîyî. Girseyî çalakîye de fotografê kesanê ke bin çiman de ameyê vîndîkerdiş û qetilkerdiş girewtî. Hîkayeya vîndîkerdişê Nîhat Aydoganî hetê îdarekarê ÎHD’yî yê Êlihî Zana Yucel Bozkurtî ra ame wendiş.
Eşkerayîye bi deqîqeyêk çalakîya roniştişî qedîya.
