Hemserekeya Pêroyî ya DBP’yî Çîgdem Kiliçgun Uçare çarçewaya pêvînayîşanê şarî de keyeyanê ke mucadeleyê azadîye de cuya xo vîndî kerda reyde ameye têhet. Aye dîyar kerd ke rîpelêko newe abeno û wina va: “Şarê ma tarîxê xo nuseno û ganî bi mucadeleyê xo azadîya xo qezenc bikero.”
DBP’yî çarçewaya pêvînayîşanê şarî de Meletî de keyeyanê ke merdimê înan mucadeleyê azadîye de cuya xo vîndî kerda reyde programêkê werdî kerd. Hemsereka Pêroyî ya DBP’yî Çîgdem Kiliçgun Uçare û zaf keyeyî tewrê programî bîyî.
Verê qiseykerdişê Çîgdem Kiliçgun Uçare, seba kesanê ke mucadeleyê azadîye de cuya xo vîndî kerda, deqîqeyêka rêzgirewtişî ameye girewtiş. Program de bêvindertiş sloganê “Şehîdî Nêmirenê” ame eştiş.
‘Tu kes ma ra zafêr wayîrê demokrasî nêvejîya’
Çîgdem Kiliçgun Uçare destpêkê qiseykerdişê xo de kesê ke mucadeleyê azadîye de cuya xo vîndî kerda, bi rêz vîr ardî û wina va: “Şarê kurdî êdî wazeno demêk bigîro. Wazeno ke a deme biqedîyo ke tede hesreta domananê xo antê, dejê xo bi hawayo tewr xorîn cuyayê û mecbur mendo ke domananê xo vîndî bikero. Ney gonî, çimeyê hêsiranê çiman, înkar, asîmîlasyon û şîdet; wazeno cuyêka seypê û azade awan bikero ke tede kurdî ke unsuranê bingeyênan ê nê welatî ra yê, bicuyê. Na welat de tu şar ma ra zafêr wayîrê demokrasî û aştîye nêvejîya. Bi hezaran domanê Kurdîstanî ke beno ma nameyê înan zî nêzanê, sayeyê înan ma kişta yewbînan de yê, sayeyê înan ma gamanê xo bi hêz erzenê. Coka ma tewr zaf keyeyanê xo rê teşekur kenê ke wayîrê domananê winasîyan vejîyayê û înan pîl kerdê.”
‘Ma rîpelêko newe akenê’
Çîgdem Kiliçgun Uçare dîyar kerd ke şarê kurdî herêma Kurdîstanî de rixmê heme polîtîkayanê qedênayîş û qirkerdişî zî estbîyayîşê xo pawito. Aye qiseykerdişê xo wina qedêna: “Ewro ma zemînêk ser o yê ke ma do munaqeşe bikerê ke ma do o mîras û o mucadele senî dewam bikerê. Ewro tu sîyasetmedar nêeşkeno vajo ‘Kurdî êdî çin ê’. Rojava de DAÎŞ’î reyde, Tirkîya de polîtîkayanê înkar û asîmîlasyonî reyde, Rojhelat de komara îdamî reyde ribirî mendî, la bi serfirazî heme ra vejîyayî. Bi wayîrvejîyayîşê tarîxê mucadeleyî û sey şarêkî ke tu kes nêeşkeno înkar bikero, çar parçeyanê Kurdîstanî de ma bî hêz û îradeya tewr xurte ke ala demokrasî berz kena. Ma rîpelêka newe akenê; şarê ma tarîxê xo nuseno û ganî bi mucadeleyê xo azadîya xo qezenc bikero.”
Program bi werdî qedîya.
