Merdimê Vîndîbîyayan û îdarekarê ÎHD’yî ewro sey her hewte no hewte zî panc şaristanan de vejîyayî meydanan. Înan aqûbeta vîndîbîyayan persayî û waşt ke vîndîbîyayî bêrê dîyayîş, kiştox û faîlî bêrê girewtiş û cezakerdiş.
Vîrardişo tewr xorînan ê ke nêameyê tedawîkerdiş ra yewe nêdîyayîşê vîndîbîyayan o. Serranê 80 û 90an de şaristananê Bakurê Kurdîstanî û Tirkîya de bi hezaran kesî destbend de ameyî vîndîkerdiş û kiştiş. Hema bi seyan vîndîbîyayî est ê ke esteyê înan nêameyê dîyayîş. Keyeyî yanî Merdimê Vîndîbîyayan û îdarekarê şûbeyanê Komela Heqê Merdiman (ÎHD) her roja şeme meydanan de yê û wazenê ke vîndîbîyayî bêrê dîyayîş û faîlî bêrê girewtiş û cezakerdiş. No hewte zî Merdimê Vîndîbîyayan û îdarekarê ÎHD’yî Amed, Êlih, Riha, Colemêrg û Îzmîr de meydanan de aqûbeta vîndîbîyayan persayî. Înan waşt ke faîlî bêrê girewtiş û mesulan ra hesab bêro persayîş.
AMED
Merdimanê Vîndîbîyayan û Şûbeya ÎHD’yî ya Amedî çalakîya xo ya “Wa Vîndîkerdeyî Bêrê Vînayîş, Faîlî Bêrê Muhakemekerdiş” hewteyo 926. de verê Abîdeya Heqê Cuyayîşî ya Parka Koşûyolûyî ya qezaya Rezanî ya Amedî de dewam kerde. Pawitoxê heqanê merdiman, endam û îdarekarê sazgehanê sîvîlan ê komelkî û merdimê vîndîbîyayan tewrê çalakîye bîyî. Çalakîye de fotografê kesanê vîndîkerdeyan ameyî girewtiş.
Çalakîya nê hewteyî de aqûbeta Alî Tekdagî ame persayîş ke 13ê teşrîna peyêna 1994î de Berê Koyî yê Amedî de ameybî destbendkerdiş û dima ey ra tu agahî nêameybî girewtiş. Destpêkê çalakîye de hîkayeya Alî Tekdagî hetê îdarekarê ÎHD’yî Bawer Çîldemîrî ra ame wendiş.
Bawer Çîldemîrî badê wendişê hîkayeya vîndîkerdişê Alî Tekdagî bale ante bêcezayîya derheqê kesanê vîndîkerdeyan de ser û va ke ganî dewlete polîtîkayanê bêcezayîye ra fek veraday.
Dima waya Alî Tekdagî Îffet Tekdage ard ziwan ke hetanî ke kiştoxê birayê aye bêrê muhakemekerdiş, a do meydanan de bibo.
Eşkerayîye badê çalakîya roniştişî qedîya.
ÊLIH
Merdimanê Vîndîbîyayan û îdarekaranê Şûbeya ÎHD’yî ya Êlihî zî hewteyo 762. de çalakîya “Wa Vîndîkerdeyî Bêrê Vînayîş, Faîlî Bêrê Muhakemekerdiş” verê Abîdeya Heqanê Merdiman a Cadeya Gulistanî de kerde. Çalakîya nê hewteyî de Merdimê Vîndîbîyayan aqûbeta Ahmet Yetîşenî persayî. Ahmet Yetîşen 13ê teşrîna peyêna 1994î de merkezê Êlihî de hetê cendirmeyan ra ameybî remnayîş û a roje ra nat ey ra tu agahî nêameya girewtiş. Çalakîye de îdarekar û endamê ÎHD’yî, Merdimê Vîndîbîyayan, Dayîkê Aştîye û zaf kesî tewrê çalakîye bîyî. Çalakîye de fotografê kesanê ke destbend de ameyê vîndîkerdiş û qetilkerdiş ameyî girewtiş. No hewte hîkayeya vîndîkerdişê Ahmet Yetîşenî hetê îdarekarê ÎHD’yî Alî Karadagî ra ame wendiş.
Eşkerayîye bi deqîqeyêk çalakîya roniştişî qedîya.
RIHA
Şûbeya ÎHD’yî ya Rihayî û Merdimanê Vîndîbîyayan hewteyo 87. de çalakîya xo ya bi waştişê “Wa Vîndîkerdeyî Bêrê Vînayîş, Faîlî Bêrê Muhakemekerdiş” kerde. Merdimê Vîndîbîyayan û pawitoxê heqanê merdiman Parka Novadayî ya qezaya Halîlîyeyî ya Rihayî de ameyî têhet. Çalakîye de pankartêko ke fotografanê vîndîbîyayan ra ameybî viraştiş û fotografê vîndîbîyayan ameyî girewtiş. Endamê sazgehanê sîvîlan û zaf merdimê vîndîbîyayan tewrê çalakîye bîyî.
ÎHD’yî çalakîya xo ya nê hewteyî de aqûbeta Sadik û Seyîtxan Ulumaskanî pers kerd. Ê 4ê kanûna 1997î de wexto ke qezaya Wêranşarî ya Rihayî ra şîyêne Amed, ameybî vîndîkerdiş û a roje ra nat înan ra tu agahî nêameya girewtiş.
Îdarekara ÎHD’yî ya Rihayî Demet Aykute hîkayeya vîndîkerdişê Sadik û Seyîtxan Ulumaskanî wende.
Eşkerayîye badê deqîqeyêk çalakîya roniştişî qedîya.
COLEMÊRG
Şûbeya Komela Heqê Merdiman (ÎHD) ya Colemêrgî û Merdimanê Vîndîbîyayan çalakîya “Wa Vîndîkerdeyî Bêrê Vînayîş, Faîlî Bêrê Muhakemekerdiş” hewteyo 252. de seba şilîye binaya xo ya Atolyeya Zagrosî ya Kuçeya Hunerî ya Geverî de kerde. Çalakîya nê hewteyî de aqûbeta Hamza Tutanî ame persayîş ke 8ê teşrîna peyêna 1985î de merkezê Geverî de hetê polîsan ra ameybî destbendkerdiş û vîndîkerdiş.
Eşkerayî hetê îdarekara ÎHD’yî Evîn Tan Demîrkane ra ame wendiş. Eşkerayîye de venga muhakemeyêka adilane ame dayîş.
Eşkerayîye bi çalakîya roniştişî qedîya.
ÎZMÎR
Şûbeya ÎHD’yî ya Îzmîrî seba persayîşê aqûbeta vîndîbîyayan û cezakerdişê kiştoxan verê Sumerbanka Kehene ya Konakî de eşkerayîyêk daye. Çalakîye de pankartê “Vîndîbîyayîş wijdanê to yo, wayîrê wijdanê xo vejîye” ame akerdiş. Çalakî ke her di hewteyan de reyê bena, no hewte aqûbeta Uzeyîr Kurtî ser o bîye ke teşrîna peyêna 1993î de ameybî vîndîkerdiş.
Îdarekara Şûbeya ÎHD’yî ya Îzmîrî Vetha Aydine qiseykerdişê xo de dîyar kerd ke aştîyêka komelkîye ya raşte tena wexto ke merdim dej û binpaykerdişanê demo vîyarte reyde ribirî bimano, mumkin a.
Vetha Aydine bale ante ser ke şertanê ke tede raştî nêvejîyena werte, edalet nêyena ca û bêcezayî dewam kena de, pawitişê heqanê merdiman, aştîye û demokrasîyêka daîmîye awan nêbena. Aye wina va: “Wa înkar û bêcezayîya ke 33 serrî yo dawaya Uzeyîr Kurtî de dewam kena, biqedîyo. Uzeyîr Kurt pîyê 7 domanan bî û dewa Axilî ya qezaya Bismilî ya Amedî de cuyayêne. Mabênê 23 û 25ê teşrîna peyêna 1993î de hêzanê emnîyetî yê ke leşker û cerdewaman ra pêk ameyêne dewa Axilî de operasyonêk kerd. Tewrê operasyonî de her keyeyê dewe ame cigêrayîş. Tayê keyeyî zî ameyî veşnayîş. 13 dewijî ameyî destbendkerdiş. 12 dewijê ke operasyon de ameybî destbendkerdiş, 26ê teşrîna peyêne de ameyî veradayîş. La dima Uzeyîr Kurtî ra tu agahî nêameye girewtiş.”
Vetha Aydine dîyar kerd ke heme hewldayîşê huqûqî yê keyeyê Kurtî bêcewab mendî û wina va: “33 serrî yo ke dawaya Uzeyîr Kurtî de înkar û bêcezayî dewam kena. Ma reyna venga îqtîdar û mesulanê edlîye danê ke goreyê wezîfeyanê huqûqê mîyanneteweyî hereket bikerê.”
