Colemêrg – Zekî Çîftçî ke TEDAŞ’î ra teqawut bîyo, merkezê Colemêrgî de karê sera dest pêkerd. Zekî Çîftçî bi keda destê xo zerzewatê cîya cîyayî rameno: firingî, bacanê sîyayî, xîyar, bexdenûs, roka, pîyaz û sewbîna. O hem pê îstîfade keno hem zî debara xo pê keno.
Herêma Colemêrgî bi zimistananê xo yê dergan, serdîya giran û cografyaya xo ya koyane goreyê herêmanê bînan seba cuye û zîraetî hîna zehmet a. Şertê giranî xo reyde mucadeleyêkê cuyî zî ardenê. Welatijê ke herême de cuyenê, cuye û debara xo goreyê şertanê nikayinan awan kenê. Ê vera zehmetîyan çareserîyê neweyî vînenê.
Karmendo teqawit Zekî Çîftçî badê desan serranê xizmetê resmî, Taxa Merzanî ya merkezê Colemêrgî de karê sera dest pêkerd. Zekî Çîftçî seraya xo de zerzewatanê cîya cîyayan ê xozayîyan rameno. O bi berhemanê sera hem debara xo keno hem zî zerreyê xo pê şa keno.
‘Hezkerdişê erdî û zîraet’
Zekî Çîftçî serranê dergan sazgehanê resmîyan de xebitîya û TEDAŞ’î ra teqawut bî. Zekî Çîftçî dîyar kerd ke badê teqawitîye waşto ke sera de zîraet bikero û wina va: “Di serrî yo ke ez karê sera kena. Ez bi amancê ticaretî nêkewta nê karî. Mi waşt ke bi karê zîraetî mijûl bibî. Hewaya ma ya Colemêrgî serdin a. Mi zî muracatê Mudirîya Zîraetî ya Wilayetî kerd û seraya xo awan kerde. Zerzewatê ke sera de bîyî, emser zaf bîyî. Ma hem berhemanê sera ra hetanî ke ma rê bes bî werd, hem cîranan rê da, hem zî zerzewatrotoşan rê rot.”
‘Karê sera xozayî yo, bê derman û hormon zî beno’
Zekî Çîftçî dewamê qiseykerdişê xo de da zanayîş ke o seraya xo de bitaybetî zerzewatanê sey firingî, bacanê sîyayî, xîyar û îsotî rameno. Ey derheqê feydeyanê sera de wina va: “Cayê seraya mi qij o, coka ez bitaybetî firingî, xîyar û îsotan ramena. Zerzewatê ke vila benê, sey kundir û gundoran, ez kêm ramena; ê zaf ca gênê. Şertanê hewaya Colemêrgî de zîraet aşma hezîrane de dest pêkena, çunke cayê ma serdin û berz o. La ramitişê sera aşma adare de dest pêkeno û aşma hezîrane de ti berhemanê aye wena. Şarê ma karê sera ra xelet nêzdî beno. Goreyê şarî berhemê sera bi dermanan virazîyenê û hormonin ê. La wina nîyo. Erdê Merzanî qelew nîyo, coka ma wisar û payîz de peyinê heywanan kenê erdî ke qelew bibo.”
‘Feydeyê sera’
Zekî Çîftçî derheqê hawayê karê sera de dîyar kerd ke o zerzewatanê zafan seba zimistanî wedareno. Ey wina va: “Naylonê sera naylonanê bînan ra cîya yo, qalind o. Bitaybetî seba serayan ameyo viraştiş. Naylonê aye qayîm o û wexto ke vewre yan varan varena, sera pawenô. Colemêrg de roje germ a, şewe zî serdin a. Seba nê ferqî hewa xirab bena, coka zerzewatî zî xirab benê. La sera de no çî çin o. Zerzewatê nê wextî ê zimistanî ra hîna bitam ê. Ma seba zimistanî bi zerzewatan 40-50 şûşeyê melemenî viraştê û ma zimistan de înan wenê.”
‘Ganî şarê ma hewcedarê teberî nêbo’
Zekî Çîftçî peynîya qiseykerdişê xo de seba feyde û dahatê sera teklîf kerd ke sakinê Colemêrgî serayan awan bikerê û şarê herême hewcedarê teberî nêbo. Ey wina va: “No kar karêko zaf rind o. Şarê ma hema nêmusayo. Merdim hem bi zîraetî mijûl beno hem zerzewatê xo hetanî ke bes bo weno, hem zî cîran û keye pê wenê. Ez wazena ke kamî rê ca esto, xo rê serayêke awan bikero. Eke zerzewat do Antalya û Îran ra bêro, wa tîya sera de zêde bibo û Colemêrg muhtacê teberî nêbo. Eke kooperatîfêk awan bikerê û zerzewatê serayan vila bikerê zerzewatrotoşan, hîna rind o. Hem do xercê ey kêm bibê hem zî şarê ma do xo rê dahatêk qezenc bikero. Nika ramitiş qedîya. Ez do tîya pak bikerî, bikinî û zimistan de ez do pîyazan biramî. Hem seba xo, hem seba şarê xo û hem zî seba zerzewatrotoşan.”
