TJA Sêwregi de vera şîdetê ser cinîyan û polîtîkayanê bêcezayîye bi eşkerayîyêk dest bi çalakîyanê 25ê teşrîna peyêne kerd. Verfeka DEM Partî Ayşegul Dogane vat: “Ganî ma pêro xo seba nê têkoşînî berpirsîyar bivînê.”
Têgêrayîşê Cinîyan ê Azadan (TJA) bi sloganê “Bi hêzê cewherî û îradeyê azadî, nika demê cinîyan o” Sêwrega Rihayî de Parka Lezgoyî ra heta Parka Kanlikuyuyî rayîrşîyayîş kerd û bi eşkerayîyêk dest bi çalakîyanê 25ê Teşrîna Peyêne, Roja Mîyanneteweyî ya Têkoşînê Vera Şîdetê Cinîyan Ser o kerd. Verfeka DEM Partî Ayşegul Dogane, Hemşaredara Şaredarîya Amedî ya Şaristanê Girdî Serra Bucake, Parlamentera DEM Partî ya Rihayî Dîlan Kunt Ayane, sazgeh û dezgehê cinîyan û zaf cinîyan rayîrşîyayîş de ca girewt. Rayîrşîyayîş de pankarta “Bi hêzê cewherî û îradeyê azadî, nika demê cinîyan o yo” ameye akerdene û pankartê “Seba xoza nika demê cinîye yo”, “Vera faşîzmî nika demê cinîye yo”, “Ma faşîzm û zîhnîyetê camêrdserdestî rê vanê ney”, “Ma wayîrê şorişê cinîye vejîyenê”, “Seba pawitişê cewherî nika demê cinîyan o”, “Kampusan ra heta kuçeyan cinîya rêxistinbîyaye û azade” ameyî berzkerdene û sloganê “Jin jiyan azadî”, “Jin jiyan azadî; azad bike Rêbertî”, “Bijî Serok Apo” ameyî vatene.
Eşkerayî hetê aktîvîsta TJA’yî Başak Saridale ra ameye wendene.
‘Her roje cinî yenê kiştene’
Başak Saridale dîyar kerd ke şîdetê ser cinîyan dewam keno û da zanayene ke polîtîkayê şerê taybetî yê Kurdîstan de no hal xorîn kenê. Başak Saridale bale ante dewayanê kiştişê cinîyan ser o û derheqê sîstemê ke kiştoxan paweno de nê çîyî ardî ziwan: “Rîyê dinya ser o her roje tewr kêmî sey û heştay cinî yenê kiştene. Her serre nêzdîyê sey hezar cinî bi hêrişanê camêrdan yenê kiştene. Hîrê cinîyan ra yewe şîdetê fîzîkî reyde, di cinîyan ra yewe zî pêroyê cuya xo de şîdetê ruhî reyde rî bi rî manena.”
‘Polîtîkayê bêcezayîye nêyenê qebulkerdene’
Başak Saridale qiseykerdişê xo de bale ante vilabîyayîşê hişbiran û polîtîkayanê şerê taybetî yê kuçeyanê Kurdîstanî ser o û dîyar kerd ke emnîyetê komelî û kuçeyan ameyo hedefgirewtene û wina vat: “Ewro her kuçeyê Kurdîstanî de çeteyê hişbiran gêrenê, nê çeteyî gede û ciwananê kurdan anê mîyanê torra xo û cuya înan tarî kenê. Hişbiro ke kuçeyan de yo, keye de beno şîdet. Kêneke û cinî bi zor û tehdîdan ver bi şîdetî yenê antene. Seba naye emnîyetê kuçeyanê ma nêmendo. Ganî rojêk verê rojêk nê polîtîkayan ra fek bêro veradayene, kes nê ra pey ameyoxê komelî ser o kay nêkero. Nê karê qilêrinî yê vera cinî û gedeyan, fikr û ruhê Prosesê Aştîye û Komelê Demokratîkî yê ke ma ramenê, reyde pê nêgênê. Çunke aştî tena wexto ke huzurê komelî est bo ca gêna. Eke cinî prosesî ra teber bêrê verdayene, eke polîtîkayê camêrdserdestî xorîn û hîra bibê, eke şîdetê vera cinîye bêro nimitene û meşrû bêro hesibnayene aştîya komelkî awan nêbena.”
Vengdayîşê têkoşînê seba 25ê Teşrîna Peyêne
Başak Saridale ard ziwan ke cinî tena vera şîdetê camêrdan ney, vera polîtîkayanê ke kiştoxan pawenê zî têkoşîn kenê û venga heme cinîyan da ke 25ê teşrîna peyêne de vengê xo berz bikerê û nê çîyî ardî ziwan: “Ma do keye bi keye, kuçe bi kuçe vera sîstemê desthilatdarîya *camêrdserdestî* xo rêxistine bikerê û seba awankerdişê komelêkê bêşîdetî bixebitîyê.”
‘Bêrê ma pêro aştîyêka birûmete û pîyaciwîyayîşêko azad rêxistine bikerê’
Vatoxa DEM Partî Ayşegul Dogane bale ante amancê rayîrşîyayîşî yê Sêwreg ser o û derheqê mewzûyî de nê çîyî ardî ziwan: “Ma çira tîya de yê, Sêwreg seba ma çira muhîm o? Sêwreg cayê şaristanîye yo, cayêko tarîxî yo. Zaf kesê muhîmî Sêwreg ra vejîyayê. Ewro ma tîya de qala şîdetê ser cinîyan kenê. Na meseleyêka şexsî yan zî keyeyî nîya. Na meseleyêka sîstemî ya. Eynî wext de problemê ma û komelî yo. Na cografya de serebûdê şermî yê girdî benê, ganî vera naye têkoşîn bêro ramitene. Dayîkêk tîya de qîrraye û vat: ‘Êdî bes o.’ Ganî ma bişêrê bikerê, seba naye zî cinî pêşeng ê. Cinîyê ke ewro tîya de ameyî pêser, germîya zerrîya xo arde tîya. Ganî ma kiştiş û qirkerdişê cinîyan bikerê problemê xo yo komelkî. Na tena berpirsîyarîya partî û kesanê rêxistinbîyayeyan nîya, ganî na berpirsîyarîya her ferdêk bo.
Ma rojanê tarîxîyan ra vîyarenê, prosesê ke ewro vejîyayo meydan, bi keda şima û qerardarîya şima vejîyayo meydan. Nika ma vanê demê cinîyan o, ma amade yê? Verê heme çîyan ganî ma vera şîdetê vera cinîyan werzê. Eke ma bibê pêşeng ganî ma verê cû destê xo nê problemî ser o ronê. Ewro camêrdî zî mîyanê ma de yê; seba cuyêka hempare ya seypê û azade, qetlê cinîyan qasê ma problemê înan zî yo. Ganî ê zî xo seba nê têkoşînî berpirsîyar bivînê. TJA tîya ra destpêkêko muhîm keno. TJA tîya ra vengê xo berz keno ke cinî vera şîdetê ser cinîyan xo tena hîs nêkerê.”
Eşkerayî bi berzkerdişê sloganê “Jin Jiyan Azadî” û “Bijî hevkariya jinan!” qedîya.
