Merkezê Çimdarîya Heqanê Merdiman ê Sûrîye (SOHR) da zanayene ke hîrê rojanê verênan ê teşrîna peyêne de rîyê serebûdanê şîdetî û sucanê edlî ra 15 kesî ganê xo ra bîyî.
Sûrîye de kiştişî aşkera zêde benê ke cuya şarî timûtim xeterî de verdanê. Mekanîzmayê bitesîrî ke sivîlan bipawê, kêmî yê; çekî bê kontrol vila bîyî û serranê şerî yewîneyê emnîyetî û edlî qels kerdî. Nê çîyan reyde bêemnîyetî xorîn bîye û kes hesab nêdano.
Herêmanê cîya-cîyayan ê Sûrîye de xeterî hema zî cuya sivîlan tehdîd kenê. SOHRî bi belgeyan tesbît kerd ke hîrê rojanê verênan ê teşrîna peyêne de 15 sivîlî ke 5 gedeyî zî mîyanê înan de bîyî, ameyî kiştene. Sebebê nê kiştişan serebûdê cîya-cîyayî, çalakîyê şîdetî û sucê edlî yê.
SOHRî 4ê teşrîna peyêne de venga berpirsîyaran da ke cuya sivîlan bipawê, peynîya bêemnîyetî û vilabîyayîşê çekan bîyarê, êyê ke beşdarê sucanê edlî bîyî, taqîb bikerê û çarçewaya qanûnî de hukm bikerê ke binpaykerdoxî hesabdayîş û ceza ra xelas nêbê. Sewbîna waşt ke seba sînordarkerdişê xeteranê adirê bê hedefî tedbîrê lezabezî bêrê girewtene, operasyonê pakkerdişê mayînan û mendeyanê şerî bi taybetî waranê ciwîyayîş û citkarîye de bêrê zêdekerdene û seba ke gede û sivîlî nê xeteran ra bêrê pawitene, kampanyayê hişyarîye bêrê destpêkerdene.
Merkezê Çimdarîya Heqanê Merdiman ê Sûrîye bale ante ser o ke kiştişê 15 kesan tena hîrê rojan de nîşanêko xeternak o; no nîşan mojneno ke xeterê ke heqê cuye tehdîd kenê, çiqas gird ê. SOHRî dîyar kerd ke seba garantîkerdişê emnîyet û selametîya cuya sivîlan, xurtkerdişê serdestîya huqûqî û seba ke peynîya bêcezayîye bêro, hewceyê çalakîyêka cidî û lezabeze est o.
