Hêza Deryayî ya Supayê Pasdaranê Şorişê Îranî da zanayîş ke Neqebê Hurmuzî de di tankerê petrolî û yew romorkêk mayînan ro qelebîya.
Hêza Deryayî ya Supayê Pasdaranî derheqê hedîseyî de eşkerayîyêka nuştekî daye. Eşkerayîye de dîyar kerd ke wexto ke di tankerê petrolî û yew romorkêk waştêne Neqebê Hurmuzî ra bivîyarê, mayînan ro qelebîyayê. Supayê Pasdaranî wina va: “Şewa vîyarteye di hedîseyê cîyayî virazîyayî. Tankerêka pîle ya petrolî waştêne ke rayîrêko neresmî yê başûrê neqebî ra bivîyara, gina mayîneyêke ro. Netîce de adir kewt keştîye, keştîye zerar dîye û vindarte. Tankerêka bîne ya zaf pîle zî wexto ke waştêne nê rayîrî ra rojhelatê Neqebê Hurmuzî ra vejîyo, sebebê adirêkê pîlî ra vindert. Keştîyêka antişî zî ke seba ardimê kişnayîşê adirî nêzdîyê tankerî bîbî, adir kewt aye.”
Eşkerayîye de ame dîyarkerdiş ke di teyareyê bêmerdimî yê tewirê “Lucas” ke DYA de ameyê viraştiş, ameyê “zeptkerdiş”. Eşkerayîye de wina ame vatiş: “Hêzanê ma kontrolê di teyareyanê bêmerdiman ê dişmenî yê tewirê Lucas girewt û rayîrê înan vurna. Înan teyareyî bi weşî ardî war û xo bin kontrol de girewtî. Caardişê çalakîyanê neqanûnîyan Neqebê Hurmuzî de, DYA rê zerarêko ekonomîk ê hîna pîl û şikestişanê sîyasîyan ê hîna giranan ra teber tu netîce nêano.”
