Hemşaredara verêne ya qezaya Pasûrî ya Amedî Sadîye Suere bi behaneyê “heqaretkerdişê Serkomarî” Antalya de ame tepîştene.
Sadîye Suere weçînayîşanê herêmkîyan ê serra 2014î de lîsteya Partîya Aştî û Demokrasî (BDP) ra sey Hemşaredara qezaya Pasûrî ya Amedî ameybî weçînayene. Sebebê qiseykerdişê ke wextê serekîya xo de kerdbî, derheqê Sadîye Suere de bi îdîaya “heqaretkerdişê Serkomar Recep Tayyîp Erdoganî” Dadgeha Cezaya Esasî yê Pasûrî de dewa ameybî akerdene û netîceyê dewa de 2 serrî û 6 aşmî cezaya hepsî ameybî dayene. Na dewa şîkayetê Qeymeqam Fatîh Dulgerogluyî ser o ameybî akerdene; Dulgeroglu cayê Şaredarê Pasûrî yê BDP’yî Metîn Dînarî de amebi tayînkerdene ke wezîfe ra amebi girewtene. Qeymeqam Dulgeroglu îdîa kerdbi ke Suere kombîyayîşêkê meclîsê şaredarî de destê ey nêgirewto û seba Serkomarî çekuya “munafiq” xebitnaya.
Tu agahî nêameye parekerdene
Polîsan telefon keyeyê Sadîye Suere kerd ke Antalya de ciwîyeno û vat ke derheqê Sadîye Suere de qerarê tepîştişî vejîyayo û ganî şêra edlîyeye îmza bierza. La Suere ke şîbî Edlîyeya Antalya, ameye tepîştene û şawîyaye hepisxane. Avûkatê Suere zî dîyar kerd ke derheqê babete de hema tu agahî nêresaya înan û nêzanê ke Suere do çend wext hepisxane de bimano.
Derheqê hadîseyî de
Sadîye Suere 5ê çeleyî 2017î de hetê Wezaretê Karanê Zereyî ra wezîfe ra ameybî girewtene û cayê aye de qeyûm amebi tayînkerdene. Badê tepîştişî, ney ra teber Dadgeha Cezayanê Giranî ya 8. ya Amedî de zî bi îdîayanê “endamtîya rêxistine” û “propagandaya rêxistine” dewa ameybî akerdene. Nê dewayan de bi pêroyî 9 serrî û 2 aşmî cezaya hepsî ameybî dayene. Suere badê ke paketo newe yê reformê edaletî bî qanûn, 2yê teşrîna peyêne 2019î de ameybî veradayene.
