Edene – Mîyanê Dayîkanê Aştîye de ke seba Rayberê Şarê Kurdan Abdullah Ocalanî ver bi Ankara kewtî rayîr, Afîfe Kartale pê linga xo ya bestîye ca girewt. Kartale vat: “Ganî gerîlayê ke çekê xo verdayî bêrê meclîs û sîyaset bikerê. O wext ma vanê ke aştî tam est a.”
Dayîkê Aştîye ke seba azadîya Rayberê Şarê Kurdan Abdullah Ocalanî û seba Prosesê Aştîye û Komelê Demokratîkî şaristananê Vakurê Kurdîstanî Amed û Wan de ameyî pêser û ver bi Ankara kewtî rayîr, resayî Ankara. Nê dayîkan ra hem emrgirdî hem zî nêweşî est bî. Dayîkanê nêweşan ra yew zî Afîfe Kartale bîye. Kartale nêweşîyanê tansîyonî, şekerî, cigere û linge reyde zî û tansîyonê aye berz bîyo zî pê gopal û pê linga xo ya bestîye rayîranê Ankara de ca girewt.
‘Ez seba Rayberîye kewta nê rayîrî’
Afîfe Kartale bale ante muhîmîya aştîye ser o û vat ke seba aştîye pê linga xo ya birîndare û pê nêweşîyanê xo kewta rayîrê Ankara: “Heta ke ez bikewa tabût ez do nê rayîrê aştîye de şêra. Ez tena seba lajê xo nêameya ke hepisxane de yo. Ez seba Rayberîye kewta nê rayîrî. Eke Rayberê Şarê Kurdan Abdullah Ocalan azad bibo ma zî azad benê. Heta ke o azad nêbo ma azad nêbenê.”
‘Ganî gerîlayê ke çekê xo verdayî bêrê meclîs û sîyaset bikerê’
Kartale wina dewam kerd: “O wext ma vanê ke aştî tam est a. Tay mendo ke 2 serrî biqedîyê la hema zî gamê şênberî nêameyî eştene. Ma gaman erzenê, wa ê zî gaman bierzê. Heta ke hepsîyê nêweşî nêrê verdayene, ez tabût de zî bibîya, eke vajê dayîkî seba aştîye rayîr şinê, ez merg ra zî werzena û rayîr şina. Coka wa lezabez gaman bierzê.”
‘Ma dayîkî êdî nêwazenê tabûtanê domananê xo bikirişê’
Afîfe Kartale qalê muhîmîya aştîye kerd û vat: “Wa aştî bikewo dinya. Wa gonî nêrijîyo. Gama ke gonî rijîyena hesirê çimanê dayîkan rijîyenê. Ma dayîkî êdî nêwazenê tabûtanê domananê xo bikirişê. Wa domanê ma êdî hepisxaneyan û koyan de şehîd nêbê. Wa hepsîyanê ma verdê, wa gerîlayê ma bêrê û serekê ma bêro mîyanê şarê xo; o wext ma do rehet bibê. Wa seba hepsîyanê ma zî polîtîkaya ‘poşmanîye’ hewanê. Domananê ma çîyêko xelet nêkerdo. Ez bi xo vana, kesê ke vanê ‘ma poşman ê’ wa nêrê keyeyê mi. Lajê mi zî xora nêvano ‘ez poşman a’. Ma do Ankara de şêrê verê AKP’yî, MHP’yî û Wezaretê Edaletî. Ma do aştîye bîyarê.”
