Amed – Dayîkê Aştîye seba azadîya Rayberê Şarê Kurdî Abdullah Ocalanî û seba Prosesê Aştî û Komelê Demokratîkî kewtî rayîrê Ankara. Dayîkî rayîr de zerrîweşî û dejanê xo pare kenê.
Dayîkê Aştîye zaf şaristanan ra ameyî Amed û Wan. Uca ra seba azadîya Rayberê Şarê Kurdî Abdullah Ocalanî û seba Prosesê Aştîye û Komelê Demokratîkî kewtî rayîrê Ankara. Nê dayîkan ra tayênan domanê xo mucadeleyê azadîye de vînd kerdê. Domanê tayênan hepisxane de yê. Domanê tayênan zî ne şehîd kewtê ne zî hepisxane de yê la seba ke ê kurd ê, domananê dayîkanê bînan zî sey domananê xo vînenê û zerreyê înan zî sey zerreyê dayîkanê bînan veşeno. Coka ê kewtî no rayîr. Waştişê nê dayîkan tena azadîya Rayberê Şarê Kurdî Abdullah Ocalanî û statuyê kurdan o.
Rayîr de kilam, govende û dej
Dayîkî rayîr de ca ca pîya huyenê, ca ca pîya kilaman vanê û govende gêrenê. Ca ca zî derdanê xo yewbînan rê vanê û pîya dejenê. Tayê cayan de sereyê xo nanê verê pencereyan û teber ra niyadanê. Beno ke o wext domanê înan ê şehîdkewteyî yenê vîrê înan yan zî eke domanê înan hepisxane de bê, yenê vîrê înan û pê dejenê. La dayîkî vera nê derdan ancî hêzê xo kenê yew, zerrîweşî û dejanê xo yewbînan rê pare kenê û hêzdar asenê.
