Merdimê Vîndîbîyayan û îdarekarê şûbeyanê ÎHD’yî yê Amed, Êlih û Colemêrgî sey her hewte no hewete zî aqûbeta vîndîbîyayan persayî. Înan waşt ke kiştoxî bêrê girewtiş û cezakerdiş.
Çalakîya cigêrayîş û waştişê edaletî ya Merdimanê Vîndîbîyayan û şûbeyanê Komela Heqê Merdiman (ÎHD) yê Amed, Êlih û Colemêrgî dewam kena. Her hîrê şaristanan de sey her hewte Merdimanê Vîndîbîyayan û îdarekaranê ÎHD’yî çalakî kerdî. Înan waşt ke vîndîbîyayî bêrê dîyayîş, faîl û kiştoxî bêrê girewtiş û cezakerdiş.
AMED
Merdimanê Vîndîbîyayan û Şûbeya ÎHD’yî ya Amedî çalakîya xo ya “Wa Vîndîkerdeyî Bêrê Vînayîş, Faîlî Bêrê Muhakemekerdiş” hewteyo 925. de verê Abîdeya Heqê Cuyayîşî ya Parka Koşûyolûyî ya qezaya Rezanî ya Amedî de dewam kerde. Pawitoxê heqanê merdiman, endam û îdarekarê sazgehanê sîvîlan ê komelkî û merdimê vîndîbîyayan tewrê çalakîye bîyî. Çalakîye de fotografê kesanê vîndîkerdeyan ameyê girewtene.
ÎHD û keyeyê vîndîbîyayan çalakîya nê hewteyî de aqûbeta Mehmet Şîrîn Bayramî persayî. Mehmet Şîrîn Bayram teşrîna peyêna 1996î de qezaya Pasûrî ya Amedî de hetê cerdewaman û leşkeran ra ameybî vîndîkerdiş. Çalakîye de verê cû dayîka Mehmet Şîrîn Bayramî Remzîye Bayrame qisey kerd. Remzîye Bayrame bale ante prosesê aştîye ser û wina va: “2 serran ra zafêr o ke proses dest pêkerdo la seba kesanê ke bi destê dewlete ameyê vîndîkerdiş tu çî nêameyo kerdiş. Faîlî nêameyê dîyayîş û tu kes nêameyo cezakerdiş. Ganî faîlî bêrê dîyayîş û kesê ke nê çîyî kerdê bêrê cezakerdiş.”
Dima waya Mehmet Şîrîn Bayramî Halîme Bayrame qisey kerd. Aye bale ante hîkayeya birayê xo ser û waşt ke kesê ke birayê aye kişto, bêrê girewtiş û cezakerdiş.
Dima Endama Komîsyonê Vîndîbîyayan ê ÎHD’yî Berfîn Elçî hîkayeya vîndîkerdişê Mehmet Şîrîn Bayramî wende.
Eşkerayîye bi deqîqeyêk çalakîya roniştişî qedîya.
ÊLIH
Merdimanê Vîndîbîyayan û îdarekaranê Şûbeya ÎHD’yî ya Êlihî zî hewteyo 761. de çalakîya “Wa Vîndîkerdeyî Bêrê Vînayîş, Faîlî Bêrê Muhakemekerdiş” verê Abîdeya Heqanê Merdiman a Cadeya Gulistanî de kerde. Çalakîya nê hewteyî de Merdimê Vîndîbîyayan aqûbeta Nazim Gulmezî persayî. Nazim Gulmez 15ê teşrîna verêna 1994î de dewa Qirmizîkoyî ya qezaya Xozatî ya Dêrsimî de hetê leşkeran ra ameybî remnayîş û qetilkerdiş. Çalakîye de îdarekar û endamê ÎHD’yî, Merdimê Vîndîbîyayan, Dayîkê Aştîye û zaf kesî amade bîyî. Çalakîye de fotografê kesanê ke destbend de ameyê vîndîkerdiş û qetilkerdiş ameyê girewtiş.
Hîkayeya vîndîkerdişê Nazim Gulmezî endamê Şûbeya ÎHD’yî ya Êlihî Bîlal Bîlgînî wende.
Eşkerayîye bi deqîqeyêk çalakîya roniştişî qedîya.
COLEMÊRG
Şûbeya ÎHD’yî ya Colemêrgî û Merdimanê Vîndîbîyayan çalakîya “Wa Vîndîkerdeyî Bêrê Vînayîş, Faîlî Bêrê Muhakemekerdiş” hewteyo 251. de Kuçeya Hunerî ya Geverî de dewam kerde. Çalakîya nê hewteyî de ÎHD û Merdimê Vîndîbîyayan aqûbeta Abdulkerîm Yurtseven, Mîkdat Ozenen û Munîr Saritaşî persayî. Nê hîrê kesî 27ê teşrîna verêna 1995î de dewa Alyewa ya qezaya Geverî de destbend bîbî û ameybî vîndîkerdiş.
Eşkerayî hetê Hemserekeya ÎHD’yî ya Colemêrgî Sîbel Çapraze ra ame wendiş. Eşkerayîye de ame dîyarkerdiş ke 31 serrî yo kiştoxê Abdulkerîm Yurtseven, Mîkdat Ozenen û Munîr Saritaşî nêameyê muhakemekerdiş.
Badê eşkerayîye torna Abdulkerîm Yurtsevenî Zelal Yurtsevene bi nameyê keyeyî qisey kerd. Zelal Yurtsevene îfade kerd ke kalikê aye 73 serreyîya xo de ame vîndîkerdiş. Hetanî nika tu kes nêameyo muhakemekerdiş û cezakerdiş.
Eşkerayîye bi çalakîya roniştişî qedîya.
