‘Xoza ya Kurdîstanî bêemsal a, berhemê ey derman ê’
Wan – Ronîşteyê dewa Kaçîtî Osman Semoyî bale ante ra xoza ya dewlemende ya Kurdîstanî ser o û vat: “Vilikê cîya cîyayî çiqas zêde bê, mêşan rê hende rind o. Coka hingimênê zozanê ma yê Şaxî bêemsal o û seba tenduristîya merdiman zî zaf rind o.”
Qezaya Şaxî ya ke Wanî ra girêdaya, bi xoza ya xo bale ancena xo ser. Dewan de ronîşteyê herêmî heywandarî, hingimên berhemkerdiş û goz pêhesnayîş ra debara xo kenê. Wexto ke payîz ame, karê pêhesnayîşê gozan û hingimênî zî dest pêkerd. Mêşê hingimênî, mîyanê rengbirengîya vilikan û xoza ya Şaxî de hingimêno bêemsal afirnenê. Ronîşteyê qezayî ê berhemanê ra bêpar nêmanenê û ya ke xoza afirneno, para xo ey ra gênê.
‘Ma her serre zimistan koç kenê şîyenê Çukurova’
Kaçîtî ra Osman Semoyî derheqê cuyayîşê dewe de qisey kerd û dîyar kerd ke ê wisarnan û hamnanan dewa xo de manenê, zimistan de zî şîyenê herêmê Çukurovayî. Osman Semoyî dîyar kerd ke ê debara xo vêşêr bi mêşwanî kenê û vat: “Ma hetê bînî ra şîyenê karê mewsimî zî, sey pêhesnayîşê findiqî û sebzeyan. Tena bi karê dewe ma nêeşkenê debara xo bikerê, coka ma her serre zimistan koç kenê û şîyenê cayanê sey Edeneyî û xebitîyenê. Karê mêşan zî zehmet o. Heta payîz, aşma kanûne de ma îta zozanan deyî me. Kanûne ra dima ma şîyenê Çukurova û gulane de reyna agêrenê welat.”
‘Kurdîstan cayêko pîroz o’
Osman Semoyî qisey xo domna, pesnê taybetîya xoza ya Kurdîstanî da, derheqê dermanbîyayîşê hingimênî xozayî de qisey kerd û vat: “Wexto ke ma şîyenê Çukurova, ma mêşê xo zî berdêne. Mabênê hingimênê ma yê îta û yê Çukurova de ferqêko girs est o. Kurdîstan, bi rengbirengîya vilikanê xo cayêko pîroz o. Vilikê cîya cîyayî çiqas zêde bê, mêşan rê hende rind o. Coka hingimênê ma yê zozanê Şaxî bêemsal o û seba tenduristîya merdiman zî zaf rind o. Ma wazenê ke her kes bêro, biceribno û bivîno.”
‘Eke aştî pêk bêro, gundîyan rê zî rind beno’
Osman Semoyî derheqê prosesê “aştî û komela demokratîk” û tesîrê ey de zî hêvî û fikrê xo wina vatî: “Ez hêvî kena ke prosesê aştî serkewo. Aştî do şarê ma rê rind bo. Bawerîya ma Rayberê ma ser o zî est a, o do nê prosesî serkewte bikero. Dewaya ma dewayêka tale nîya û nêeşkenê tal zî bikerê, ma dewaya xo dima yê. Eke aştî aver bêro, dewan rê zî rind beno. Zozanê zaf rindî estê, labelê qedexe yê. Coka ma nêeşkenê mêşanê xo bibere uca. Zozanê sey Mamxuran, Kelahî û Feraşînî qedexe bîyî, nika hêdî hêdî ê qedexeyî zî yenê hewanayene.”
‘Seba talûkeya kewtişî êdî gozcinayîş çin o’
Osman Semoyî derheqê talûkeyanê karê gozcinayîşî de zî qisey kerd û derheqê zehmetîyanê kar û barê xo yê dewe de dîyar kerd ke weşîya dewe ya, zehmetîyê ey zî estê. Osman Semoyî wina domna: “Dewa ma de vêşêr pesî yenê weyekerdene, darê gozan zaf ê û mêşî yenê weyekerdene. Cuyayîşê ma yê dewe zehmet o, labelê ma rê cayêko pîroz o. Ez bawer a ke ma do her hetê cuyayîşî de serkewê.
Nika darê ma yê gozan zaf bîyê pîr, coka ma cayê daranê pîran de daranê ciwanan ronanê. Cayê ke darê ma yê gozan tede ê, verkendal ê û coka bi talûke ê. Zaf kesî daranê gozan ser o kewtî û birîndar bîyî, coka êdî ma nêvejînê ser. Ma pawenê ke goz xo bi xo bikewê û ma zî erdî ra pêser bikerê. Gozê ke ma pêser kenê, ma seba debara xo roşenê.”
