Amed – Meclîsa Dayîkanê Aştîye derheqê prosesê aştîye, rewşa girewteyanê nêweşan û binpaykerdişê heqan de eşkerayîyêk daye. Dayîkan dîyar kerd ke ê do seba azadîya Rayberê Şarê Kurdî Abdullah Ocalanî şêrê Ankara û konê aştîye akerê.
Meclîsa Dayîkanê Aştîye verê binaya Şûbeya ÎHD’yî ya Amedî de eşkerayîyêka çapemenîye wende. Eşkerayîye de qalê prosesê aştîye, rewşa girewteyanê nêweşan, îhlalê heqanê girewteyan û dergkerdişê înfazê girewteyan bî. Dayîkan îfade kerd ke ê do roja yewşeme saete 10.00 de Amed ra hetê Ankara ser rayîr kewê û uca pêvînayîşan bikerê. Ê do seba azadîya Rayberê Şarê Kurdî Abdullah Ocalanî û girewteyanê sîyasîyan şêrê. Amancê înan o bîn zî no yo ke prosesê aştîye ser bikewo.
‘Êdî ganî tayê gamê şênberî bêrê eştiş’
Eşkerayîye de bi nameyê dayîkan Nezahat Teke qisey kerd. Nezahat Teke dîyar kerd ke bi venga 27ê sibate û Prosesê Aştîye û Komelê Demokratîkî zerreyê dayîkan de hêvîyêk virazîyaya. Nezahat Teke wina va: “La ma nêwaşt ke no proses di yan zî hîrê serrî dewam bikero. Ma waşt ke êdî her çî wextêko tewr nêzdî de bêro çareserkerdiş. Ma bi xo wazenê ke no proses aver şêro û gamê hîna şênberî bêrê eştiş. Ma wazenê ke hetê dewlete ra zî tayê gamî bêrê eştiş. Verê her çîyî ma azadîya Rayberê Şarê Kurdî wazenê. Eke Rayber azad nêbo tu kes azad nêbeno. Ma wazenê ke qanûnê ke do bêrê vetiş, bêmana nêbê û biresê statuyêka raştikêne. Seba na amanc ma zî sey dayîkanê aştîye do hetê Ankara ser şêrê. Çunke qerarê şerî zî, munaqeşeyê aştîye zî Ankara de yenê dayîş. Coka ma do roja yewşeme saete 10.00 de hetê Ankara ser şêrê. Dayîkê ma do her ca ra hetê Ankara ser şêrê. Ma do konê xo akerê û hewcedarîyê ma çi bê, ma do uca peyda bikerê. Ma do sey dayîkan uca nobeta aştîye bigîrê. Êdî ganî tayê gamê şênberî bêrê eştiş.”
‘Ma do şêrê û waştişanê xo înan rê zî vajê’
Nezahat Teke dewamê qiseykerdişê xo de da zanayîş ke hepisxaneyan de girewteyê nêweşî est ê. Înfazê nê girewteyan yenê veşnayîş, cezayê înan yenê dergkerdiş û ê nêyenê veradayîş. Nezahat Teke wina va: “Ma êdî nêwazenê ke hepisxaneyan ra cenazeyî vejîyê. La verê her çîyî ganî girewteyê hepisxaneyan bêrê veradayîş û gamê şênberî bêrê eştiş. Ma bitaybetî sazgehanê sîvîlan ê komelkî û dorûveranê demokratîkan ê Ankara ra piştîdayîş pawenê. Ma wazenê ke her kesê ke zerreyê ey de hîsê aştîye est o û her çar hetan ra aştîye paweno, Ankara de piştî bido dayîkan.”
‘Ganî her kes bibo vengê aştîye’
Nezahat Teke peynîya qiseykerdişê xo de îfade kerd ke waştişê înan o yewin û bingeyên azadîya Rayberê Şarê Kurdî û statuyê ey o. Aye qiseykerdişê xo wina qedêna: “Ganî Rayberê Şarê Kurdî û girewteyî bêrê veradayîş û her çar hetan ra gamê şênberî bêrê eştiş. Ma venga heme dayîkanê dinya danê. Seba ke nê dejî biqedîyê, ganî her kes bibo veng. Ganî Amed ra û her ca ra dayîkî sere wedarnê û piştî bidê dayîkan. Ma do bi girseyêko xurt vejîyê rayîr û ma hêvî kenê ke ma destvengî peyser nêagêrê.”
