Serekwezîrê Îraqî Elî Zeydî vizêr şi Şam û Serekkomarê demkî yê Sûrîye Ehmed Şara reyde pêvînayîş kerd. Pêvînayîş de rayîrê xurtkerdişê têkilîyan ser o qisey bî. Hetkarîya her di hetan a warê ekonomîk, komelkî û emnîyetî û koordînasyonê helwestan ê babetanê herêmkî û mîyanneteweyî zî ameyî qiseykerdiş. Babetan ra yewo bîn zî îxrackerdişê neftê Îraqî yo bi xeta Banyasî bî.
Ofîsê Serekwezîrîya Îraqî derheqê muhtewaya pêvînayîşê Elî Zeydî û Ehmed Şara de eşkerayîyêk weşanaye.
Eşkerayîye de ame dîyarkerdiş ke vizêr Elî Zeydî û Ehmed Şara pêvînayîşêko hîra yê heyetanê her di welatan îdare kerd. Ame vatiş ke Elî Zeydî dîyar kerd ke şarê Îraq û Sûrîyeyî di welatan de yew şar ê. Elî Zeydî dîqete ante muhîmîya averberdişê hetkarîya her di welatan û xebata seba aştî û aramîya herême ser.
Eşkerayîye de zî ame vatiş ke Ehmed Şara seba ziyaretê Elî Zeydî û heyetê ey teşekur kerd. Ehmed Şara îfade kerd ke têkilîyê her di hetan xorîn ê. Ey reyna waştişê Sûrîye ard ziwan ke hetkarîya Sûrîye û Îraqî bireso sewîyeya tewr berze.
Ame dîyarkerdiş ke pêvînayîş de îxrackerdişê neftê Îraqî yê bi xeta Banyasî ser o zî ame qiseykerdiş. Ame vatiş ke ganî rojane heta 2 mîlyon bermîl neft bieşko bêro îxrackerdiş.
Yeno vîrardiş ke verê nika zî Bexda û Şamî derheqê newekerdişê xeta neftî ya Kerkûk-Banyasî de munaqeşe kerdbi. Armanc no bî ke neftê Îraqî limananê Deryaya Sipîye ra bireso bazaranê dinya. Goreyê vateyan eke projeyê newekerdişê xeta Kerkûk-Banyasî temam bibo, rojane do 2 mîlyon bermîl neft bêro îxrackerdiş.
