Wan – Girewteya nêweşe Felem Aker Hepisxaneya Tîpê T ya Wanî de yena tepiştiş. Felem Akere de zaf nêweşîyê giranî est ê û weşîya aye tehlûke de ya. Mêrdeyê aye Eşref Akerî da zanayîş ke rewşa cinîya ey her roje hîna xirab bena. Eşref Akerî waşt ke Felem Aker bêra veradayîş.
Felem Aker 14ê tebaxa 2020î de qezaya Şemzînanî ya Colemêrgî de binçim bîbî. Înan aye bi îdiaya “endamîya rêxistinî” girewtbî. Felem Aker 6 aşman dima ameyêbî veradayîş. La 2yê êlula 2022î de cezayê aye yê 6 serr û 3 aşme hetê Dadgehê Berzî ra ame tesdîqkerdiş. Dima Felem Aker berdîye Hepisxaneya Tîpê T ya Wanî. Felem Aker 4 serrî yo ke hepisxane de ya. Rewşa aye her roje hîna xirab bena. Ganî Felem Aker lezabez bêra veradayîş û tedawî bibo.
‘Şertê û mercê hepisxaneyî tehlûkedar ê’
Mêrdeyê Felem Akere Eşref Akerî da zanayîş ke Felem bi nêweşîyanê giranan reyde mucadele kena. Eşref Akerî wina va: “14ê kanûna 2024î de Felem ameya ameliyatkerdiş (safra kesesî ra). La ameliyatî ra pey dejê aye yê lemî û problemê aye yê bînî dewam kerdê. Felem de nodulêko tîroîdî est o ke kategorîya Bethesda III de yo. Nêweşîya Haşîmotoyî zî aye de est a. Şiko ke nê nodulan de kanser bibo, est o. Ganî demêko nêzdî de Felem bêra ameliyatkerdiş.”
Eşref Akerî da zanayîş ke Felem de nê nêweşîyê giranî zî est ê:
- gastrîto kronîk,
- reflû,
- berzbîyayîşê nîşanê tumorî,
- kêmbîyayîşê kalsîyumî,
- tengbîyayîşê nefesî,
- servîsîta kronîke.
Eşref Akerî wina dewam kerd: “Nê nêweşîyî kontrolê doktorî yo daîmî, tedawîyo serûber û piştîdayîşê werdî wazenê. La şertanê hepisxane de no proses bi weşî nêeşkeno dewam bikero.”
‘Tehlûkeyê felçî vîyarnayo’
Eşref Akerî dewamê qiseykerdişê xo de da zanayîş ke şewa 4ê hezîrana 2025î de cinîya ey krîzêko giran vîyarna. Ey wina va: “Felem bi gileyê tengbîyayîşê nefesî û nêlewîyayîşî ameya revîr. Saturasyonê oksîjenê aye ginayo se ra 45. No erj sînorê tehlûkeyê cuyî yo. La kontrolêko kilm ra pey aye reyna erşawitê qawîş. Goreyê îfadeyê Felem Akere, bedenê aye hişk bîyo. Aye nêeşkaya bi xo bêra, coka bi ardimê embazanê xo şîya mîyanê nivînê xo. Aye de nîşanê demarî bîyî. La ihtîmalê felçî nêame erjnayîş, rewşa aye sey psîkolojîke ameya dîyayîş. Tedawîyêka hîraye nêameya kerdiş.”
‘Aye benê nêweşxane û ancî anê hepisxane’
Eşref Akerî dîyar kerd ke 6ê hezîrane de Felem reyna berda nêweşxane. La kontrolêko kilm ra dima reyna peyser ardîye hepisxane. Eşref Akerî qiseykerdişê xo wina dewam kerd: “Nê heme prosesan de ne agahîyêka raşte ameya dayîş ne zî tedawî ame dewamkerdiş. Bi qerarê dadgehî Felem Akere rê wasî ame tayînkerdiş. Ame tescîlkerdiş ke Felem Aker nêeşkena xo bewnîyo. Herçiqas problemê aye yê weşîye wina giran ê zî Felem Aker hema hepisxane de yena tepiştiş.”
‘Bedenê aye her roje beno qels’
Eşref Akerî da zanayîş ke Felem her dîyayîşî de beno qels. Felem bi zehmet nefes gêna û hewcedarîyanê xo yê bingeyênan nêeşkena biqedîno. Eşref Akerî qiseykerdişê xo wina qedîna: “Felem va ke şertê hepisxane seba cuyêka weşe munasib nîyê. Ê tena mucadeleya cuyî dewam kenê. Goreyê Paketê Edlîye yê 10. û maddeyanê 16 û 17 yê Qanûnê Înfazê Cezayî yê Hûmare 5275, girewteyê nêweşê giranî heqê înfazê keyeyî yan zî taloqkerdişê înfazî rê wayîr ê. La herçiqas nê qeydê qanûnî est ê zî rewşa Felem Akere yena îhmalkerdiş.”
