DADî, Dêrsim de xirabkerdişê qadê Ziyareta Nisanê Oli û cehdê tamîrkerdişê camîya dewa Xoşanî rê reaksîyon nîşan da. DADî vat: “No herd, bi cayanê pîrozan ra yeno mendene ke tarîx, bawerî, ziwanê dayîke, êş, xoverdayîş û vîrê kolektîfê şarê ma xo de gênê.”
Komelê Elewîyanê Demokratîkan (DAD) derheqê domkerdenan ê ke Dêrsimî rê, tebîetê ey, bawerîya ey û erjanê ey yê komelî rê yenê kerdene de eşkerayîyêka nuşteyî daye. Eşkerayî de ke sernuşteyê “Xirabkerdişê cayanê ma yê pîrozan û erjanê ma yê komelî nêyeno qebûlkerdene” bî, qezaya Hozatî ya dewa Xoşanî de cehdê tamîrkerdişê camî û qezaya Nazimîye de qadê Ziyareta Nisane Oli de xirabkerdiş rê reaksîyon ame mojnayene.
‘Vera Dêrsimî planê nêrindî est ê’
DADî, ke bale ante ser domdarîya tarîxî ya domkerdenan, eşkerayî de nê vatî: “Dêrsim, ke serçeşmeya Raa/Rêya Heqî ya Elewîyî ya, hema zî fehmê Neheqî ra bi hedef yena girewtene. Dêrsim, ke seba sosyolojîya xo ya taybetî ya ke rastîya şarê kurdî yê elewî ser o ya, seserran ra nat çandî û fîzîkî ra hêrişan reyde ribiri maya, her dewra newe de bi cehdê cîya-cîya reyde ribiri yena.”
DADî ard ziwan ke nufusê dewa Xoşanî pêro elewî yo û camî dewrê valî Kenan Guvenî de bi amanca asîmîlasyonî ame viraştene. Eşkerayî de cehdê tamîrkerdişê camî û xirabkerdişê qadê Ziyareta Nisane Oli, ke sînorê dewa Hilbeşî de ya, bi destê şirketa enerjîyî, sey domdarîya polîtîkayanê Dêrsimî ame hesibnayene.
‘Têkilîyanê şarî û cayanê pîrozan ser rasterast tesîr keno’
DADî, ke bale ante ser ê ke ziyaret bawerî, tebîet û vîyarteyê şarî reyde girêdayîşê ci de muhîm ê, no xirabkerdiş ser o vat: “Xirabkerdişê qadê Ziyareta Nisane Oli, bi destê şirketa enerjîyî, qet nêyeno qebûlkerdene. Bawerîya Elewîyî ya Raa/Rêya Heqî de ziyaret, cayê tewr muhîmî yê ke şar bi bawerî, tebîet û vîyarteyê xo reyde girêdayîş awan kenê, yê. Xirabkerdişê nê cayan, girêdayîşê pîrozî reyde zî rasterast tesîr keno.”
‘Polîtîkaya bawerî û nasnameya tekbîyayêne yê’
DADî, ke vat ganî ya ke Dêrsim de bîya, tarîx û sîyasî de bêro nirxnayene, vat: “Her desteştenê ke Dêrsimî rê tebîet, çand û bawerî ser o yeno viraştene, tarîx û sîyasî ra cîya nêeşkeno bêro hesibnayene. Tarîxê nêzdîyê Dêrsimî, bê fehmkerdişê tesîrê polîtîkayanê tekbîyayene yê bawerî û nasnameyî yê dewlete komelî ser o nêeşkeno bêro nirxnayene.”
‘Vurnayena fîzîkî nêna qebulkerdene’
DADî, ke vat cayê pîrozan hem zî hamilê vîrê komelîyî yê, ard ziwan ke desteştenan de ganî djnyaya bawerîya şarî bêro vîrkerdene û vat: “Coxrafya Dêrsimî tena ra kayan, newalan û awan ra nîya. No herd, bi cayanê pîrozan ra yeno rîşnayene ke tarîx, bawerî, ziwanê dayîke, êş, xoverdayîş û vîrê kolektîfê şarê ma xo de gênê. Coka her tewrê desteştenî yê cayanê bawerîyî û awanîyanê tarîxî rê, tewr nêeşkeno sey vurnayîşêko fîzîkî yan rêzkerdiş bêro hesibnayene. Ê cayî kamcîn şertan de pêyê amayî, kamcîn amancan rê yenê bikarardene û bawerîya şarî de çi ca gênê, verênî de gêrayîş lazim yê.”
