MEBYA-DERa Êlihî bi minasebetê 40 rojîya şehîdanê Têgêrayîşê Azadîya Kurdan mewlid da. Parlamentera DEM Partî ya Şirnexî Ayşegul Dogan vat ke ê do hewn û xeyalanê şehîdan bîyarê ca.
Bi pêşengîya Komeleya Yewîye, Kultur, Piştîpêdayîş û Ardimî ya Keyeyanê ke Dergûşa Şaristanîye de Merdimê Xo Vindî Kerdê (MEBYA-DER) ya Êlihî, bi minasebetê 40 rojîya şehîdanê Têgêrayîşê Azadîya Kurdîstanî Salona Dawetî ya Vûralî de ke Taxa Pazaryerî de ya, mewlûd ame dayene. Îdarekar û endamê MEBYA-DER’î, Hemverfeka DEM Partî û parlamentera Şirnexî Ayşegul Dogane, rêxistinê partîyanê sîyasîyan ê merkez û qezayan, Dayîkê Aştîye, aktîvîstê TJA, zaf dezgehê komelê sîvîlî û zaf kesan mewlid de ca girewt.
Salone de ke mewlid tede ame dayene, posterê gird ê Rayberê Şarê Kurdan Abdullah Ocalanî û pankartê “Keye peyê şehîdanê xo de yê”, “Şehîdê ma rûmetê ma yê” û “Şehîd namirin” ameyî aliqnayene. Girseyî seba fedayîyanê Têgêrayîşê Azadîye deqeyêk rêzegirewtiş kerd û badê rêzegirewtişî slogano “Şehîd namirin” vat.
‘Ma şarêko sereberz ê’
Hemverfeka DEM Partî û parlamentera Şirnexî Ayşegul Dogan mewlid de qisey kerd û wina vat: “Rewşêka zehmet û giran a; ma qalê şînêka tewr kêmî 50 serreyî kenê. Derheqê înan de qiseykerdiş asan nîyo. Zerrîya ma zaf dejena û ma zanenê ke zerrîya şima zî dejena. Ma kurdî dinya de her ca de vanê: Ma no dej dî; Homa tu kesî rê nêdo, wa tu kes nêvîno. Ma sey şarê kurdan aşiqê şer û pêkewtişî nîyê. Nê kesan ke ganê xo fedayî kerd, seba menfeetanê xo yê şexsîyan nêkerd. Înan dest dergê tu çîyî nêkerd. Ziwan, heq û hebîyayîşê tu kesî înkar nêkerd, tu kes bêqîmet nêhesibna. Tu kesî rê nêvat ke kiştiş, qirkerdiş, bombebarankerdiş, surgunkerdiş û parçekerdiş qeder o. Ma şarêko sereberz ê. Ma çi xo rê wazenê şaranê bînan rê zî wazenê. La şarê bînî çi xo rê wazenê ma zî xo rê wazenê, çunke heqê ma zî est o, ma heqdar ê. Ma do hewn û xeyalanê şehîdan bîyarê ca. Seke yeno zanayene nika prosesêk est o; ma bi têkoşînê xo û bi mîmarê nê prosesî bawer kenê.”
Mewlidê şehîdan bi sloganê “Şehîd namirin” qedîya.
