Goreyê doneyanê bêkarîye yê aşma êlule yê TUÎK’î hûmara bêkaran 198 hezarî zêde bîye û resaye 2 mîlyon û 967 hezar kesan.
Dezgehê Îstatîstîkî yê Tirkîya (TUÎK) doneyê bêkarîye yê aşma êlule eşkera kerdî. Goreyê doneyan Tirkîya de rêjeya bêkarîye goreyê tebaxe 0,5 pûanî zêde bîye û resaye se ra 8,4. Hûmara bêkaran bi zêdebîyayîşê 198 hezar kesan bîye 2 mîlyon û 967 hezar. Hûmara kesanê ke kar kenê zî 49 hezarî kêmî bîye. Nufûsê ciwanî de rêjeya bêkarîye zêde bîye û bîye se ra 14,8.
Goreyê îstatîstîkanê hêzê karî yê êlula 2026î yê TUÎK’î kesanê 15 serreyî û zêdeyêrî de hûmara bêkaran a bêtesîrê demsale tebaxe de 2 mîlyon û 769 hezar bîye, aşma êlule de resaye 2 mîlyon û 967 hezarî. Bi no hewa rêjeya bêkarîye se ra 7,9 ra resaye se ra 8,4. Na rêje camêrdan de goreyê aşma verêne 0,2 pûanî zêde bîye û bîye se ra 6,9; cinîyan de zî 1,1 pûanî zêde bîye û bîye se ra 11,3. Hûmara camêrdanê bêkaran bi zêdebîyayîşê 57 hezarî resaye 1 mîlyon û 614 hezarî, hûmara cinîyanê bêkaran zî bi zêdebîyayîşê 142 hezarî resaye 1 mîlyon û 353 hezarî.
Aşma êlule de hûmara kesanê ke kar kenê goreyê aşma tebaxe 49 hezarî kêmî bîye û bîye 32 mîlyon û 445 hezar. Rêjeya îstîhdamî ya bêtesîrê demsale 0,1 pûanî kêmî bîye û bîye se ra 48,3. Rêjeya îstîhdamî camêrdan de se ra 65,8 de mende, cinîyan de zî 0,2 pûanî kêmî bîye û ginaye se ra 31,2. Îstîhdamê camêrdan 3 hezarî zêde bî, îstîhdamê cinîyan zî 52 hezarî kêmî bî. Hêzê karî zî aşma êlule de 149 hezarî zêde bî û resaye 35 mîlyon û 412 hezarî. Rêjeya beşdarîya hêzê karî 0,1 pûanî zêde bîye û bîye se ra 52,7. Na rêje camêrdan de se ra 70,7, cinîyan de zî se ra 35,2 bîye. Hûmara kesanê ke mîyanê hêzê karî de nîyê zî 85 hezarî kêmî bîye û ginaye 31 mîlyon û 756 hezarî.
Goreyê doneyan nufûsê ciwanî de ke 15-24 serre yo, rêjeya bêkarîye aşma êlule de goreyê aşma verêne 1,6 pûanî zêde bîye û resaye se ra 14,8. Camêrdanê ciwanan de rêjeya bêkarîye 0,7 pûanî zêde bîye û bîye se ra 10,4; cinîyanê ciwanan de zî 3,4 pûanî zêde bîye û resaye se ra 23,3.
