Hemserekê Pêroyî yê DEM Partî Tuncer Bakirhanî veng da ke “Heyetê Aştî û Sîyasîbîyayîşî” bi koordînatorîya Rayber Apoyî cade bêro ronayene û vat: “Oyo ke do nê prosesî lez bikero û bireso netîce Birêz Ocalan o.”
Prosesî de ke bi “Vengdayîşê Aştî û Komelê Demokratîkî” yê Rayber Apoyî dekewt merheleyêka newîye, Têgêrayîşê Azadîya Kurdîstanî qerarê feshî eşkera kerd, çekî veşnayî û pê hêzê xo apey ancîyayî la taloqkerdişê gamanê huqûqî û sîyasîyan ê dewlete persan û reaksîyonan keno zêde. Bakirhanî ANFyî rê qisey kerd û vat ke seba averşîyayîşê prosesî ganî bawerî bêra temînkerdene, raporê teyît û tesbîtî bê ereymendiş bêro weşanayene, Heyetê Emnîyetê Milî (MGK) qerar bido û gamê bicaardişê Qanûnê Çarçewayî dest pê bikerê. Bakirhanî vat: “Nika dora îqtîdarî ya.”
Bakirhanî vat ke rayîrê temînkerdişê bawerîye eştişê gamanê pêroyî yo la hetê dewlete ra seba garantîya huqûqî ya prosesî û şertanê xebate yê azadan ê Birêz Ocalanî halê pawitişî est o û ard ziwan: “Îdareyê Têgêrayîşî gamê muhîmî eştî. Verê çekî ameyî veşnayene, dima qerarê feshî ame, nika zî Kampê Metîna û cayê bînî yê muhîmî ameyî vengkerdene û hêzê Tirkîya ameyî ancîyayene. Kes naye qij mevîno. Nika dora îqtîdarî ya. Eke hetêk game bierzo û heto bîn bipawo bawerî yena werîyayene. Keso ke do nê prosesî lez bikero û bireso netîce Birêz Ocalan o. Her merheleya krîtîke de vengdayîşê ey ber akerd. Coka ganî bi koordînatorîya Birêz Ocalanî ‘Heyetê Haştî û Sîyasîbîyayîşî’ cade bêro ronayene. Seba naye şertêko girêdayeyê teyît-tesbît û qanûnî zî çin o.”
Bakirhanî vat ke seba ke proses bibo mende ganî bi bicaardişê Qanûnê Çarçewayî dest pê bêro kerdene, no qanûn bi qanûnanê azadî û demokratîkbîyayîşî bêro pêtkerdene û binawanîya huqûqî bêra viraştene ke heme hemwelatîyî bieşkê bi azadî û seypêyî sîyasetê demokratîkî bikerê. Bakirhanî ard ziwan ke seba naye ê demê neweyî ra vanê “Komara Demokratîk”. Bakirhanî vat ke polîtîkayêka eşkera ya ancîyayîşê hêzanê leşkerî yê Tirkîya ya Iraq û Sûrîye ra hîna çin a la ganî bibo çike netîceyo xozayî yê prosesî no yo û ard ziwan: “Eke sebeb hewa nîyayo manaya mendişê uca zî nêmanena. Ancîyayîşê hêzanê leşkerî tawîz nîyo, rayîrê têkilîyanê bi Bexda, Hewlêr û heme kurdan reyde yê hemkarî, bazirganî û enerjî akeno. Aştî ganî nê hetê sînorî de nêmana.” Bakirhanî vat ke çareserîya demokratîke ya meseleya kurdan nêeşkena bi weçînayîşî reyde bêra girêdayene û ganî verê weçînayîşî bibo rojdemo verên.
Bakirhanî vat ke aştî hîna sey “meseleya kurdan” yena qiseykerdene la fatûraya nê şerî herkesî daya û ard ziwan: “Aştî meseleya dayîkêka Amedî çend a hende meseleya dayîkêka Sêwas û Bûrsa ya zî. Îqtîdar prosesî rameno la seba komelî rê îzahkerdişî cehdê bes nêkeno. Muxalefet zî hîna nê prosesî ra teber ra ewnîyeno. Vengdayîşê ‘game bierze’ qey hertim DEM Partî ra bêro? Eke muxalefet nê persan ma ra bi vengêko berzêr bipersa haştî waştişê partîyêk ra vejîyena û bena waştişê hempare ya welatî. Ma seba awankerdişê têgêrayîşêkê haştî yo hîra û serpartîyan xebitîyenê, partî, sendîqa, baro, rêxistinê cinîyan û ciwanan, dezgehê elewîyan, nuştox û hunermendan yew bi yew zîyaret kenê. Ma wazenê ke ronayoxê nê têgêrayîşî heme Tirkîya bibo.” Derheqê Îttîfaqê Mekke û Bedirî de Bakirhanî vat ke çareserî zêdekerdişê îttîfaqanê leşkerîyan ra ney, serdestkerdişê seypêyîya mîyanê şaran, demokrasî û edaletî ra vîyarena û ard ziwan: “Karo tewr aqilane ke Tirkîya eşkena bikero temînkerdişê aştîya xo ya komelkî bi lezabez û nêbîyayîşê hetê gerginîyanê herêmkîyan o.”
