Hemsereka Konseya Rayraberdişî ya KCKyî Besê Hozat vat ke prosesî de “halo vinderte û cemedîyaye” est o çunke dewlete game nêerzena û ard ziwan ke seba averşîyayîşê prosesî ganî statuyê Rayber Apoyî bibo fermî.
Hemsereka Konseya Rayraberdişî ya KCKyî Besê Hozat bernameyê taybetî yê Medya Haber TVyî de persan rê cewab da û derheqê merheleya prosesî, têkoşînê azadîya cinîyan, pratîkanê hepisxaneyan û averşîyayîşanê herême de nirxnayîşî kerdî. Hozate vat ke înan gamê sey vindarnayîşê têkoşînê çekdarî yê vera Tirkîya û ancîyayîşê hêzan ê sînoran ra teber eştî la dewlete derheqê demokratîkbîyayîş û rastkerdişanê huqûqîyan de cewab nêdayo û venga yewîya neteweyî ya demokratîke ya kurdan da.
‘Heval Bêrîtane sembolê xeta azadî û xoverdayîşî ya’
Hozate bi şexsê Bêrîtane û şehîdanê aşma teşrîna verêne heme şehîdî yad kerdî û vat: “Heval Bêrîtane sembolê xeta azadî û xoverdayîşî ya. Vindertişê aye yo birûmet ê vera xeta hemkar, xayîn û teslîmîyetkare bitaybetî cinîyanê kurdan ser o tesîrêko zaf gird kerdo. Cewabo tewr raşt ê vîrameyîşê aye no yo ke cinîyê kurdî bi vindertişêkê sey Bêrîtane pêşengîya yewîya kurdan a demokratîke bikerê. No seba demê ke ma tede ra vîyarenê hewceyîyêka lezabez a.” Hozate ard ziwan ke kiştişê cinîyan û şîdet bi krîzê xorînî yê sîstemê camêrdê serdestî û modernîteya kapîtalîste ra girêdaye yê û Kurdîstan de zaf qetlê cinîyan rasterast hetê dewlete ra sey parçeyê polîtîkaya qirkerdişî yenê kerdene. Hozate vat: “Xopawitiş rêxistinbîyayîşî ra vîyareno. Perwerde, rêxistinbîyayîş, xopawitiş û têkoşînê hemparî yê cinîyan sîstem û kulturê camêrdê serdestî peyser anê û wextî mîyan de danê vîyarnayene.”
‘Ganî herkes dewlete ra biewnîyo: game erzena yan nêerzena?’
Hozate vat ke di serranê peyênan de Têgêrayîşê Azadîya Kurdîstanî gamê tarîxî eştî la dewlete de gamêka cidî çin a û ard ziwan: “Rewşa vindertiş û cemedîyayîşî est a, no hetê dewlete û îqtîdarî ra yeno. Tecrîd hewanênîyayo, Rayberîya ma nê prosesî nêramena. Şertê ma yo bingeyin kongreyê feshî de o bî ke Rayber Apo bi azadî nê prosesî birameno.” Hozate vat ke xeberê derheqê vengkerdişê şikeftanê Metîna, Xakurkê û Garê de şerê taybetî yê û ard ziwan: “Eke dewlete bi cidîyet game bierzo gerîla her ca de çekan verdano û sîyasetê demokratîkî rameno. Ganî herkes dewlete ra biewnîyo: game erzena yan nêerzena?”
“Nêzdîbîyayîşê Rayberîye nêzdîbîyayîşê kurdan o’
Hozate Mehmet Uçumî sey temsîlkarê xeta înkar û bêçareserîye ya mîyanê dewlete name kerd û vat: “Azadîya Rayber Apoyî çareserîya demokratîke ya meseleya kurdan reyde yew a. Heta ke Rayber Apo azad nêbo, statuyê ey fermî nêbo û o bi azadî nê prosesî nêramo eşkera yo ke gerîla do yew game zî nêerzo. Nêzdîbîyayîşê Rayberîye nêzdîbîyayîşê kurdan o.” Hozate vat ke hepisxaneyan de huqûqê dişmenîye û şerî yeno tatbîqkerdene, înfazê hevalanê ke 30 serrî ra zêde hepisxane de mendê û nêweşê giranî yê, yenê veşnayene û na rewşe komel de bawerî nêvirazena. Hozate ard ziwan ke operasyonê vera şaredarîyan, qayûmî û hêrişê vera çapemenîya muxalîfe seba naye yê ke proses komelkî nêbo û vat: “Bê demokratîkbîyayîşî no proses ne komelkî beno ne zî aver şino. Tirkîya bê çareserkerdişê meseleya kurdan demokratîk nêbena, bê demokratîkbîyayîşî zî meseleya kurdan çareser nêbena.”
‘Tirkîya bê çareserkerdişê meseleya kurdan û elewîyan estbîyayîşê xo nêeşkena bigîra garantî’
Derheqê herême de Hozate vat ke Amerîka Iraq ra nêancîyaya, hêzêka hegemonîk a û polîtîkaya aye pêtkerdişê dewletanê merkezîyan o ke no seba statuyê Kurdîstanê Federalî xeterin o û ard ziwan: “Çîyo tekane ke nê xeteran hewanano yewîya neteweyî ya demokratîke ya kurdan a. Ganî her rêxistina kurdan naye fehm bikera û nê bingeyî ser o xo bibedilna. Demokratîkbîyayîşê îdareyê Başûrî zî nê warî de muhîm o.” Hozate vat ke polîtîkaya hêzanê mîyanneteweyîyan vera Îranî teslîmgirewtiş yan bedilnayîşê rejîmî yo, polîtîkaya îdamî xişm viraşto û rayîrê raşt demokratîkbîyayîşê Îranî yo ke bingeyê demokrasîya herêmkî ser o yo. Derheqê Îttîfaqê Mekke, Îttîfaqê Bedrî û peymana Lîbya de Hozate vat ke Tirkîya wazena vengîya Îranî pirr bikera û bi qebulkerdişê Amerîka û NATOyî hereket kena la bê çareserkerdişê meseleya kurdan û elewîyan estbîyayîşê xo nêeşkena bigîra garantî û herême de nêbena hêzêka menda.
‘Rewşa Tirkîya dewletanê Ewropa ra xirabêr a’
Hozate derheqê serewedartişanê Fransa û Ewropa de vat ke no krîzê sîstemîk ê modernîteya kapîtalîste û dewleta neteweyî yo, çimeyê komelî şonê çekdarbîyayîş û şerî û mabênê dewlemend û feqîran de kendalêko xorîn abîyo û ard ziwan: “Rewşa Tirkîya dewletanê Ewropa ra xirabêr a. Ganî nê têgêrayîşê şaran her ca de bibê rêxistinbîyaye û wayîrê program û stratejî bibê. Projeyê neteweyê demokratîk û sîstemê konfederalî ke Rayberîya ma aver berdo, seba heme dinya alternatîf o.”
