Lepikê tepîşteyê nêweşî Hayati Deniz Kaytanî, ke raporê doktorî reyde seba kêmîya dokuyê destî xebitnayêne, mudirê didin ê ke newe hepisxane rê ame tayînkerdene bi ser de girewtî. Avûkatê Kaytanî Alişan Şahinî vat: “Ya ke ameya kerdene, îşkencaya psîkolojîk a.”
Goreyê xebera muxabira MA Sema Bîngole Hepisxaneyê Tîpê F ya Emnîyetê Berzî ya Bolu de tedaya tepîştîyan bi zêdebîyayîş dewam keno. Yeno vatene ke hepisxane, ke xeylî rey binpêkerdişê heqan reyde beno rojdem, mudirê didinê newe tayînbîyayîşî reyde tedaya hema zî vêşî bîya. Girewtişê cilê zimistanê tepîştîyan kerdeyanê verênanê mudirê newî ra yew o. Mudirî, ke tedaya xo de sînor nêşinasneno, hema zî ver şî û lepikê tepîşteyê nêweşî Hayati Deniz Kaytanî, ke raporê doktorî reyde mecbûr o bixebitno, bi ser de girewtî.
‘Ez raporî nêşinasna’ vatiş reyde lepikî bi ser de girewtî
Avûkatê Kaytanî Alişan Şahinî bale ante ser ê ke bi destê mudirê didinê nêzdî de hepisxanî rê ame tayînkerdene, tedaya tepîştîyan zêde bîya. Şahinî, ke vat sereştişê koxuşan reyde tedaya tepîştîyan ser o beno, vat: “Raporê kêmîya dokuyê destê Hayatîyî sabît o. Ey ganî zimistan de ê lepikî bixebitno. Labelê mudirê didinê newe, ke Erzirom ra bi nakilî ameyo, Hayatîyî rê vat ke ‘Raporê to nê hepisxanî de nêxebitîyeno. Ez ey raporî nêşinasneno.’ Bi nê tewrî lepikê ke Hayatîyî rê elzem ê bi ser de girewtî û bi nê rayîrî îşkence kerdene wazeno.”
Şahinî, ke vat mudirê yewin ke yew serre ver hepisxane rê ame tayînkerdene û mudirê didinê ke newe Wan û Erzirom ra ame tayînkerdene nê tedayan kenê, vat: “Nê rêvebiranê ke perwerdeya nijadperestî ya xurt girewta yê. Yanî vanê ke ‘Ez goreyê waştena xo eşkena şima rê îşkenceyan bikerî.’ Manaya xo na ya.”
Şahinî ard ziwan ke Kaytanî rê doku bi destan û payan ra ganî bêro nakilkerdene, labelê na têkoşîn seba hirê serran dewam kena. Şahinî vat: “Nêweşxaneya Fakulteya Tibbî ya Îzzet Baysalî û mudirê hepisxaneyî destê xo dayî yewbînî û Hayatîyî rê raporêk ‘Hepisxane de tena şeno bimano’ viraşt. Mîyanê yew serre de no rapor hirê rey vurîyaye. Peynîya rexne û vengvetişanê ma ra, çend aşmî naye ra ver reyna raporê ‘Hepisxane de tena nêşeno bimano’ da Hayatî.”
Veradayîşê 26 tepîştîyan yeno astengkerdene
Şahinî, ke ard ziwan ke Hepisxaneya Bolu de astengkerdişê varadayîşî û veşnayîşê înfazî zî dewam kenê, vat ke veradayîşê 13 tepîştîyan, ke ê ra tepîştîyê ke serra 34înî de înfazê înan de ê zî est ê, sebebê keyfîyanê Heyetê Îdare û Çimdarîye ra yeno astengkerdene. Şahinî vat ke 13 tepîştîyan rê, tevî ke itîrazê cezayanê dîsîplînî ra ê qerarî hewanayî, înfazê înan veşnayo û vat: “Bayê aştî û omîdî mixabin nêameyê Hepisxaneyê Bolu, hata nêzdîye ra zî nêvîyartî. Hepisxaneya Bolu de verê pêrune mudiro yewin, dozgerê komarî, dozgerê hepisxaneyî û îdarecîyê bînî yê kadroyê cêrênî karî reyde nê bêhuquqîyan û ezîyetî tepîştîyan rê danê ciwîyayene.”
‘Xebera Wezaretê Edaletî nê bêhuqîyan ra est a’
Şahinî, ke ard ziwan ke Wezaretê Edaletî şikayetî û dilekçeyan reyde nê rewşî ra xeberdarê, vat ke tevî nê zî hepisxane de kerdeyî dewam kenê. Şahinî bale ante ser ê ke Prosesê Aştîye û Komelê Demokratîkî ra pey zî tedaya tepîştîyan dewam kena û vat: “Yew het ra ma behsê aştî û omîdî kenê. Heto bîn ra ma behsê îşkencaya psîkolojîkî kenê, yanê behsê tiştanê ke Hepisxaneyê Bolu rê nêameyî. Gani na didilîye peynî bibo. Dewlete ya bivajo ke ‘Ez nê karî de samîmî ya, heta peynîye do bibero’ û idarecîyê ke vera ci vîndenê û yan hêzê caardişê cidî bikero, yan zî eşkera bivajo ke ‘Ez samîmî nîya. Ez nê muameleyan dana dewam kerdene. Şima zî naye rind bizanê.’”
‘Idarecîyê tedakarî gani cayê xo de nêmanê’
Şahinî, ke waşt idarecîyê ke hepisxaneyî de kerdenanê bêhuquqîyan kenê , bêrê ceza kerdene, vat: “Hepisxaneyê Bolu demêko derg o ke bîyo mekanê idarecîyanê ke nijadperestî de fikirê qayîmî û kerdeyê qayîmî est ê. Ganî idarecîyê newî yê ke îradeya aştîye rê piştî bidê bêrê ardene, ya zî înan, ke hema-hema nê, bêrê kerdene ke ê zî îradeya aştîye rê piştî bidê, ya zî înan rê ceza bêro dayene. No îşkencayo psîkolojîk o. Beyê naye ma nêeşkenê îfade bikime. Nê idarecî ganî bêrê mecbûrkerdene ke seba omîdê aştî, ke raya pêroyî rê ame vatene, bi kerdeyêkê cayî bibo. Eke nê mecbûrkerdişî ra pey ê hema zî nijadperestî dewam kenê, ganî nê idarecîyan nêverdê ke ê kursîyan de bê. ”
