Amed – Seba talankerdişê xozaya Gorseyî şar dewa Nerbişî ya qezaya Mîyaro ya Xarpêtî de amê têhet û vat: “Ma wayîrê xozaya xo vejîyenê.”
Qezaya Pîranî ya Amedî de Rêxistina Ciwanan û Meclîsê Ekolojî seba talankerdişê xozaya Koyê Gorseyî şîyî dewa Nerbişî ya qezaya Mîyaro ya Xarpêtî. Uca şarê Nerbişî zî piştî da înan û pîya şîyî cayê ke darî tede yenê birnayîş. Uca pankartê “Vera talankerdişî ma xo rêxistin kenê” ameye akerdiş û dovîzê “Xoza bêveng bimano, cuye bêveng maneno”, “Destê xo xozayî ra wedarê” û “Xoza cuya ma ya” ameyî berzkerdiş.
Dewa Nerbişî ra Ahmet Yucelî qisey kerd û wina vat: “Ma nêwazenê ke tayê kesî dewa ma de xozaya ma talan bikerê. Nê kesî şaristananê bînan ra yenê û xozaya ma talan kenê. Ma şîyê verê Wezaretê Daristanan û ma vat: ‘Şima çira nê kesan rê destûr danê ke daran bibirnê?’ Înan ma rê vat ke tena darê pîlî yenê birnayîş. La tîya aseno ke darê ciwanî kok ra yenê birnayîş.”
Dima Hemserekê Şaredarîya Pîranî Hacî Akenginî zî bale ante muhîmîya xozayî ser o û wina vat: “Seba ke tîya xozaya ma yena qetilkerdiş, oksîjenê ma nêmaneno, cuya ma nêmanena. Coka ganî ma wayîrê xozaya xo vejîyê.”
Badê qiseykerdişan mîyanê daranê birnayeyan de çalakîya roniştişî ame viraştiş. Çalakî bi sloganê “Bê xozayî cuye nêbena”, “Biciwîyo xoverdayîşê Gorseyî” û “Biciwîyo xoverdayîşê xozayî” qedîya.
