Semsûr – Hemsereka Pêroyî ya DBP’yî Çîgdem Kiliçgun Uçare Semsûr de programê mewlûdî de qisey kerd ke seba kesanê ke têkoşînê azadîye de ganê xo ra bîyî ame viraştiş. Aye wina vat: “Bi sayeyê hezaran qehremanan ke ma nameyanê înan nêzanê, ewro ma sîyaset û prosesê muzakereyî ramenê. No rayîr do bi aştîya ke domanê ma hesreta aye bîyî û bi wayîrstatubîyayîşê Birêz Ocalanî bireso netîce.”
Komeleya MEBYA-DER’î ya Semsûrî seba kesanê ke têkoşînê azadîye de ganê xo ra bîyî Salona Can ya Semsûrî de programê mewlûdî viraşt. Program de pankartê “Şehîdî Rûmetê Ma yê” û “Şehîdî Nêmirenê” ameyî akerdiş. Sewbîna fotografê kesanê ke têkoşînê azadîye de ganê xo ra bîyî cayê programî de ameyî ronayîş û bê vindertiş sloganê ‘Şehîdî Nêmirenê’ ameyî berzkerdiş.
Hemsereka Pêroyî ya DBP’yî Çîgdem Kiliçgun Uçare, rêxistinê bajarî, sazgehê sivîlî yê demokratîkî, keyeyê kesanê ke têkoşînê azadîye de ganê xo ra bîyî û xeylî hemwelatijî tewrê programî bîyî. Program seba kesanê ke têkoşînê azadîye de ganê xo ra bîyî bi deqîqeyêk rêzegirewtiş dest pêkerd.
‘Bi sayeyê hezaran qehremanan ma no proses ramenê’
Badê rêzegirewtiş û wendişê duayan, Çîgdem Kiliçgun Uçare derheqê mana û muhîmîya roje de qisey kerd û bale ante rolê qehremanan ser o: “Ewro ma tîya yê, ewro ma sîyaset ramenê û prosesê muzakereyî îdare kenê. Bi sayeyê hezaran qehremanan ke ma nameyanê înan nêzanê, ma pêro bi nê zanayîşî berpirsîyarîye gênê milê xo ser. Şima seba estbîyayîşê şarê kurdan, seba têkoşînê azadî û seyyewbînîye embazîya rayîrî ya Birêz Ocalanî gird kerde. Meseleya kurdan her hetî ra kewte rojeva her kesî. Bi sayeyê domananê şima û îradeyê Birêz Ocalanî komîsyonêk ame awankerdiş. Meclîs de qanûno bingeyên ke gama verêne ya newe ra pîyabîyayîşî ya, bi nisbetêko berz ame qebulkerdiş. Ma tam na noqte de yê ke înkarî ra ver bi azadîye şona.”
‘Ganî Birêz Ocalan bi statuyêk bêro tarîfkerdiş’
Çîgdem Kiliçgun Uçare dewamê qiseykerdişê xo de bale ante prosesê aştîye ser o: “Tayê rey meseleya bawerîye vejîyena meydan; Birêz Ocalanî nê hemkêşeyî meydan ra wedarna. Ma seba nê dewreyî awankar ê; la gelo îqtîdarê AKP’yî û dewlete hazir ê ke kurdanê seyyewbînan û azadan reyde biciwîyê? Bedel û vîndîyê tewr giranî şarê kurdan dayî. Ewro ma nêwazenê domananê xo ra xatir biwazê; ma wazenê aqlê ke ma înkar keno û aqlê dewlete ra xatir biwazê. Komîsyonêk ame awankerdiş û komîsyonê binî zî ameyî awankerdiş. Ganî Îdareyê Têgêrayîşî bi statuyêk bêro tarîfkerdiş. Ganî prosesê ke Birêz Ocalanî ey rê vato aştî û sîyasîbîyayîş dest pêbikero, berê hepisxaneyan abê û rayîrê agêrayîşê hezaran kesanê sirgunî abo. Gelo bedelê naye ke merdim bi ziwan û nasnameyê xo biciwîyo, eşkeno 30 serrî bo? Vatişê ‘Kurdî kart-kurt ra ameyê’ ame caverdayîş û rîpelê ‘Kurdî est ê’ ame akerdiş. Kurdan sîstemêk awan kerd ke dewleta ke înan înkar kena mecbur verdano. Nêmeyê rayîrî ame şîyayîş; no rayîr do bi aştîya ke domananê ma xeyal kerdêne û bi wayîrstatubîyayîşê Birêz Ocalanî bireso netîce.”
Badê qiseykerdişê Çîgdem Kiliçgun Uçare program bi wendişê duayan û vilakerdişê werdî qedîya.
