AMED – Mezraya Qelesî ya dewa Çemê Êlika ya Licê de cinîyê çar keyeyan seba mehsereyî ameyî pêser. Cinîyan bê hêzê camêrdan, bi hêzê xo 2 rojan de bastîq û meşlûlî virastî û vat: “Gama ke cinî destê yewbînan bigîrê tu çî çin o ke nêeşkê bikerê.”
Bi darsayîşê engûran zaf herêman de wextê mehsereyî ame. Bêguman Amed zî nê herêman ra yew o. Mezraya Qelesî ya dewa Çemê Êlika ya Licê de zî bi resayîşê engûran wextê mehsereyî ame. Na mezra de cinîyê çar keyeyan ameyî pêser, hêzê xo kerd yew û bastîq û meşlûlî virastî. Xebate 2 rojî dewam kerd. Roja verêne cinîyan pîya engûrî arê dayî û parzûn kerdî. Roja dîyine zî awa engûran girêna û bastîq û meşlûlî virastî. Tîya de cinîyan rê hêzê fîzîkî yê camêrdan hewce nêkerd. Kotî de ke zehmetî dî, hîrê cinîyan dest da yewbînan, hêzê xo kerd yew û problem çareser kerd. Kîmya Onkol û Fîrasete Ozbek derheqê xebatanê mehsereyî de ajansê ma rê qisey kerd.
‘Tirk a la zazakî û kulturê kurdan musaya’
Kîmya Onkol ke eslê xo Mereş ra ya, qiseykerdişê xo wina da destpêkerdene: “Ez Mereş ra ya, ez tirk a. Ez zewicîyaya û bîya veyva na dewe. Ez tirk a, coka ziwanê zazakî û karê dewe ez tîya musaya. Ez pakkerdişê axuran, dotişê heywanan û zaf karanê dewe musaya. Her çîyê xo ez tîya musaya. Ma her çîyê xo dewe de virazenê, pere nêdanê û çîyêk nêgênê. Xora mi ameyîşê dewe zaf waştêne. Mêrdeyê mi nêwaştêne, mi o îqna kerd. Mi vatêne ma şêrê dewe, ez wazena dewe de biciwîya.”
Kîmya Onkole qalê mehsereyî kerd û wina vat: “Ma verê engûran çînenê, dima şîreyê înan vejenê, dima zî şîreyê înan girênanê. Ez nê karan nêzanena la embazê mi înan zanenê. Coka ê hetkarî danê mi, ez zî hektarîya înan kena. Nê karî ra zî fehm beno ke gama ke cinî destê yewbînan bigîrê tu kar çin o ke nêeşkê bikerê.”
‘Kar çend zehmet bo zî ma cinî destê yewbînan gênê û karê xo kenê’
Fîrasete Ozbeke zî verê ra heta peynî qalê viraştişê bastîq û meşlûlî kerd. Ozbeke bale ante zehmetîya karî ser o û vat: “No kar zaf zehmet o. Ma zaf betilîyayî, qewet ma de nêmend. La reyêk zî ma nêvanê ma nêkenê. No zî parçeyêkê dew o; ma mecbur ê ke bikerê. La kar çend zehmet bo zî ma cinî destê yewbînan gênê û karê xo kenê. Ma cinî hem karê camêrdan kenê hem zî yê cinîyan. Yanî no yeno a mana ke eke cinî destê yewbînan bigîrê tu çî çin o ke nêeşkê bikerê.”
