Karkerê Şaredarîya Dêrsimî yê ke 650 roje ver hetê qeyûmî ra karî ra ameyî eştene û qerarê dadgehe ra dima zî peyser şîyayîşê înan karî rê ame astengkerdene, eşkerayîyêk daye. Înan vat: “Rayberîya qayûmî, bi sipar kerdişê qanûnî, mesûlîyetê huqûqî ra xelas nêbena. Butçeya şaredarîye tena bi qirkerdişê karkeran rast nêbena. Mesûlê kêmanîya butçeyî ma karker zî nîyê. Ma wazenê ke qerarê dadgehe bêro ca û karkerê ke karî ra ameyî eştene derhal peyser bêrê.”
Sendîkaya Genel-Îşî ya Temsîlkarîya Dêrsimî, Meydanê Seyit Riza de, seba protestokerdişê qayûmî yê ke Şaredarîya Dêrsimî rê ameyo tayînkerdene û qerarê peyserardişê dadgehe ca nêkeno, eşkerayîya çapemenîye daye. Eşkerayîye de Serekê Pêroyî yê EMEP’î Seyit Aslanî û temsîlkaranê partîyanê sîyasî û rêxistinanê komelan yê demokratîk zî piştî daye.
Eşkerayîye seba Karkerê Şaredarîya Dêrsimî yê ke kar ra ameyî eştene Ali Mukanî wende. Mukanî vat ke ê karkerê ke Şaredarîya Dêrsimî de bi kede û araqê çareyê xo xebitîyayî, vat: “Tam 650 roje ver qayûmî ra karê ma, nanê ma û vereroja ma ame girewtene. Nê wext de ma heqê xo gêrayîş ra peyser nêagêrayî. Xoverdayîşî dewam kerdene ra pê, têkoşînê huqûqî de zî Dadgehê Herêmî yê Erzirom, Daîreya 6ine ya Huqûqî goreyê ma qerar da û waştişê ma yê peyseramayîşî tesdîq kerd. Labelê qayûm qerarê peyseramayîşî ca nîyano.”
To nêeşkena binê sîya mewzûatî de mesûlîyetê huqûqî ra xelas bibê
Mukanî vat ke qayûmêk Dêrsim ra “Horasanê Anadolî” vat û karkerî eştî, qayûmo bîn zî “Can Cana” vat û qerarê peyserardişî ca nêkerd. Mukanî dewam kerd: “Çîyo ke ma vanê huqûq, eke heqê esasî bipawo, manadar beno. Beno ke bêro vatene ke qayûmî qanûnî ra selahîyetê peyser nêardişî estê. Labelê selahîyetê îdarî huqûqî ser o nîyo. To nêeşkena binê sîya mewzûatî de mesûlîyetê huqûqî ra xelas bibê.”
Butçe bi nonê karkeran ra birnayîş rast nêbena
Ali Mukanî vat ke ê wazenê qerarê dadgehe bêro ca û karkerê ke karî ra ameyê eştene derhal peyser bêrê. Vat: “Hema zî, 52 karkerê hevalê ma, ke verê Tuncay Sonelî ra ameyî eştene, qerarê dadgehe ra dima şaredarê weçînayeyan ra ameyî peyserardene. Dêrsim, bêkarîye de verê rêzanê sereyan de yo. Ciwanê ma kar nêvînenê û bajar ca verdanê. Merdimî seba ciwîyayîşî ganî keyeyê xo, erdê xo û dormeyê xo yê kulturî ra nêbê cîya. Nê bajarî de zafê hevalanê ma bi zorî ameyî teqawudkerdene, 13 karkeran ra zî karê xo ame girewtene. No tena heqê ciwîyayîş û vereroja 13 kesan nîyo, heqê ciwîyayîş û vereroja keyeyanê înan zî dest ra girewtiş o. No hetê huqûqî û wijdanî de zî munasib nîyo.
Butçeya şaredarîye tena bi qirkerdişê karkeran rast nêbeno. Mesûlê kemanîya butçeye ma karkerî zî nîyê. Bi namê tasarrufî karkeran bêkar verdayene, kede ucûz û bêerj dîyene, encamê fikrêko ke kede vera yo. Ma, îradeyê şarê Dêrsimî nêdîyayîşî vera vejîyenê û wazenê ke qayûmî endî peynî bibê. Ma şaredarîye rê bar nîyê; ma karkerê ke xizmetê nê bajarî berhem danê û bi araqê çareyê xo xebitîyenê. Rayberîya qayûmî ganî bizano ke karkerî bêwayîr nîyê. Heta ke heqê xo bigîrê, ma do têkoşînê xo dewam bikerê. Ma wazenê ke qerarê dadgehe bêro ca û karkerê ke karî ra ameyî eştene derhal peyser bêrê.”
Karkeran eşkerayîye ra dima Serekê Pêroyî yê EMEPî Seyit Aslanî qisey kerd. Aslanî tekîd kerd ke ê piştî danê karkeranê xo û seba ke pêynîya qayûman bêro û şertê peyser şîyayîşê karkeran amade bibê, veng da.
