Amed – Şaredarîya Çêrmûgî ya ke destê AKP’yî de ya, dormeyê Pirdê Haburmanî yê tarixî pak nêkena û nê semedî ra dormeyê pirdî bîyo sey çopgehêk. Hemwelatij Faruk Yilmazî seba dormeyê pirdî ajansê ma rê qisey kerd û wina vat: “Dormeyê pirdî pak nîyo û her ca çop o. No problem tena kêmanîya şarî nîyo, zafêrî kemanîya şaredarî ya.”
Însanî şonê dormeyê Pirdê Haburmanî de piknîk kenê û turîstî zî yenê ziyaret kenê, labelê uca de problemêko pîl ê hîjyenî est o. No çop hetê ekolojî ra zî zerar dano û şaredarî zî eleqedarê nê karî nêbena.
Na babete ser o 9ê teşrîna verêne de ma şaredarîyî rê xeber da û ma vat ke ma do nê çîyî ser o xeber bikerê. Dima Serekê Şaredarîya Çêrmûgî Şehmuz Karamehmetogluyî, ma rê telefon kerd û rîca kerd ke ma xebera nê çopî nêvirazê. Telefon de vat ke şima xebere mevirazê ma lez ey cayan pak kenê. Ma zî goreyê waştişê ey xebere taloq kerd. Badê Şehmuz Karamehmetogluyî ma rê resmê ey cayan ruşnayî û îdia kerd ke uca de pakî ameya kerdene. Badê ma reyna şîme uca ke ma bivînê ke hela ey cayî pak bîyê yan nê. Ma dî ke tena cayêko şenik ameyo pakkerdene û resmê ey cayî ma rê ruşnê ke ma xebere nêvirazê. Her ca reyna mîyanê çopî de bî.
‘Tim her ca çop o’
Hemwelatij Faruk Yilmazî seba dormeyê pirdê tarixî Haburmanî yo ke bîyo sey çopgeh, ajansê ma rê qisey kerd û wina vat: “Ez çîyê tarixî ra hes kena û wazena bêro pawitene. Seba ney ez 40 roje de rey yeno nê pirdî ser. Bê îstîsna her wext ke yeno, dormeyê xo pak nîyo û her ca çop o. No problem teyna kêmanîya şarî nîyo, zafêrî kemanîya şaredarî ya. Ez çend saetî yo ke petê awe de çopî cêbê xo de gêna, çike uca de sitilê çopî çino ke ez çop bierzî ci. Seba ke merdiman de zî hîşyarî bêro viraştene, şaredarî ganî sitilanê çopan zêde bikero û pakîya xo hîna zaf bikero. Kesê ke teberê welatî ra yenê, seba nê pirdê tarixî yenê. Wexto ke yenê û nê halî vînenê, zaf xemgîn benê û rexne kenê. Ma pêro ganî no derheq de baldar bibê.”
Faruk Yilmazî na babete ser o venga şaredarî da û qiseyê xo wina qedêna: “Şaredarî ganî hewte de çiqas nêbo 2 rojî tîyapak bikero û kontrol bikero.”
