Endama Heyetê Îdareyî yê DÎSK Basin-Îş’î Îzel Sezere ard ziwan ke her hêrişo ke vera çapemenîye beno, rasterast hêrişêko vera heqê şarî yê resayîşê raştîye yo û vat: “Tatbîqatê qayûmî êdî bîyo metodêko sîstematîk ê sansurî.”
Vizêrî bi beşdarîya bi seyan polîsan Halk TV’yî rê qayûm ame tayînkerdene. Eynî saetan de rîyê gerreyê Serekîya Emnîyetê Sîberî ya Serkomarîya Tirkîya, X’î hesabê Ajansê Mezopotamya yê X’î Tirkîya de asteng kerd. Her roje bi seyan keyepelî û xeberî yenê astengkerdene.
‘Îbrahîm Paşali qayûmê TELE1’î bî, ewro zî qayûmê Halk TV’yî yo’
Îzel Sezere dîyar kerd ke tayînkerdişê qayûmî û vindarnayîşê weşanê Halk TV’yî mudaxeleyê azadîya çapemenîye û heqê komelî yê agahîgirewtişî yo. Nê heqî bi madeyanê 29. û 30. yê Qanûnê Esasî ameyê garantîkerdene. Sezere wina dewam kerd: “Serrêk ra ver tayînkerdişê qayûmî yê TELE1’î de nameyê Îbrahîm Paşali ame eşnawitene, ewro zî eynî name rojeve de yo. Paşali qayûmê TELE1’î bî, ewro zî qayûmê Halk TV’yî yo. No eşkera mojneno ke tatbîqatê qayûmî bîyo metodêko sîstematîk ê sansurî. Ma sey sendîka nê mudaxeleyî qet qebul nêkenê.”
‘Hesabê medyaya dîjîtale yenê qefilnayene û ekranî yenê tarîkerdene’
Sezere îfade kerd ke ewro Tirkîya de azadîya çapemenîye merheleyêka zaf giran û tarîye de ya û vat: “Keyepelî bi qeraranê dadgehan yan zî bi qeraranê îdarîyan yenê astengkerdene, hesabê medyaya dîjîtale yenê qefilnayene û ekranî yenê tarîkerdene. Hetêk ra cehd beno ke xeberdayîşê dewayanê muhîman ê sey dewaya Ekrem Îmamogluyî bêro astengkerdene, heto bîn ra rojnamegerî seba xebatanê xo yê meslegî bi tedbîranê kontrolê adlî yenê bêvengkerdene.”
‘Ganî cayanê karî de xebatê piştîdayîşî bêrê kerdene’
Sezere ard ziwan ke gama verêne vindarnayîşê polîtîkayanê sansurî ya û vat: “Ewro wayîrê kanal û dezgehan çi heyf ke zafane tehdîdanê îqtîdarî ra zafêr rêxistinbîyayîşê xebatkaran ra tersenê. Ganî dezgehê çapemenîye heqanê sendîkayîyan ê xebatkaranê xo rê hurmet bikerê û astengkerdişê rêxistinbîyayîşî hewanê.”
‘Ganî yewîye bibo warêkê koordînasyonê domdarî’
Sezere qiseykerdişê xo wina qedêna: “Ganî ma seke eşkerayîya hemparîye ya 11 rêxistinanê meslegîyan ê çapemenîye de bî, yewîye bikerê warêkê koordînasyonê domdarî. Her hêrişo ke vera çapemenîye beno, rasterast hêrişê vera heqê şarî yê resayîşê raştî yo. Ganî bi hemkarîya heme rêxistinanê ked û partîyanê muxalefetî xeta têkoşînî ya girseyîye bêra awankerdene ke medyaya muxalife bipawo.”
