Tirkîya de resnayîş û rojnamegerî binê teda û sansurê îqtîdarî de yê. Tena êlule de tewr kêmî 1270 keyepelî ameyî astengkerdene. Keyepelê Ajansa Mezopotamya reya 44. ame astengkerdene; hesabê X û Înstagramî yê Ajansa Welat, Ajansa Mezopotamya û Jinnewsî aşmanê peyênan de zaf rey ameyî astengkerdene.
Demêko derg o ke Tirkîya de pêlê sansur û astengkerdişî komelî ser o yeno ferzkerdene û heqê şarî yê resayîşê agahîyanê raştan yeno astengkerdene. Îqtîdar bi hemkarîya şîrketanê medyaya dîjîtale her roje bi seyan hesab û keyepelan asteng kena.
Keyepelê Ajansa Mezopotamya reya verêne 3ê çeleyê 2018î de ame astengkerdene; 8 serran de 44 rey ame astengkerdene û nika mezopotamyaajansi45 ser o weşanê xo dewam keno. Keyepelê Jinnewsî 23ê çeleyê 2018î de hetê BTK’yî ra ame astengkerdene; 8 serran de tewr kêmî 20 rey ame astengkerdene, kanalê YouTube yê ajanse temamen ame girewtene. Keyepelê ETHA zî 11 serran de 56 rey ame girewtene.
Yew aşme de 1270 hesabî ameyî astengkerdene
Goreyê raporê Komela Azadîya Xoîfadekerdişî (ÎFOD) êlule de tewr kêmî 1270 keyepel û hesabê Xî ameyî astengkerdene; mîyanê înan de hesabê rojnameger, dezgehê çapemenî, rêxistinê komelkîyan, ciwan, LGBTÎ û yê akademîsyenan est ê. Taqîbkerdoxê nê hesaban 35 mîlyonî ra zêdeyêr ê.
Dizdîya fonî bîye sebebê sansurî
Krîzê dizdîye yê herînayîş û rotişê fonan de nameyê Hetkara Serekê Pêroyî yê AKP’yî Fatma Betul Sayan Kaya zî vîyart: goreyê îdîayan aye nîsane de bi 63 mîlyon û 359 hezar TL hîsseyê Ozata herînayî û êlule de 1 mîlyar û 344 mîlyon TL qezenc kerd. Badê vilabîyayîşê xeberan pêlê sansurî berz bî; hesabê ke nameyê aye pare kerdêne, ameyî astengkerdene la derheqê aye de tu tehqîqat dest pênêkerd.
Hesabê ke sansur qeyd kerdêne, zî ame astengkerdene
Hesabê EngelliWebî ke hetê ÎFOD’î ra seba qeydkerdişê astengkerdişan amebî akerdene, 1ê teşrîna verêne de ame astengkerdene. 14ê teşrîna verêne de verê ke roniştişê Şaredarê Îstanbulî yê Şaristanê Girdî Ekrem Îmamogluyî dest pêkero, polîsan eşt Halk TV ser o û kanalî rê qeyûm ame tayînkerdene; Halk TV êlule de kanalo tewr zaf temaşekerde bî. Seba keyepelê T24 û hesabê TÎP’î zî waştişê astengkerdişî ameyî kerdene. Her kes, dezgeh û partîya ke vatişêk goreyê zerrîya îqtîdarî pare bêkena, rastê sansurî yena.
