Heyetê DEM Partî yo ke temsîlkaranê îdareyanê herêmkîyan ra ameyo meydan, Musteşarê Serekkomarîya Sûrîye Mezlûm Ebdî reyde kom bî. Kombîyayîş de prosesê entegrasyonî yê Rojava, piştîdayîş û hemkarîya şaredarîyanê herême reyde û prosesê aştîye yê Tirkîya ameyî munaqeşekerdiş.
Heyetê cinîyan yê DEM Partî warê îdareyanê herêmkîyan de xebitîyeno û 7ê teşrîna verêne ra nat Rojava de têkilîyanê xo dewam keno. Hemsereka Şaredarîya Girde ya Mardîn Devrim Demire zî heyet de ca gêna ke herundê aye de qeyûm ame tayînkerdiş.
Kombîyayîşê Mezlûm Ebdî reyde de prosesê entegrasyonî yê Rojava ame erjnayîş. Her di hetan averşîyayîşanê herême ser o fikr û erjnayîşê xo pare kerdî. Babetanê bînan yê kombîyayîşî ra yew zî piştîdayîş û hemkarîya şaredarîyanê Rojava reyde bî. Prosesî ser o ke Tirkîya de seba çareserkerdişê meseleya kurdan ramîyeno, fikrî zî ameyî parekerdiş.
Heyet de Hemsereka Şaredarîya Girde ya Mardîn û Hemverfeka Komîsyonê Dîplomasî yê Îdareyanê Herêmkîyan Devrim Demire, Hemsereka Şaredarîya Yenîşehîr ya Amedî Safîye Akdage, Hemsereka Şaredarîya Farqînî Sevim Biçici, Hemsereka Şaredarîya Tetwan ya Bedlîsî Belkîza Beştaş Epozdemire û endama Komîsyonê Dîplomasî Ruken Demirere ca girewt.
Heyet verê cû zî sîyasetmedara kurd Îlham Ehmede û zaf temsîlkaranê dezgehanê cîyayan reyde kom bîbî.
