Hêriş vera Teyaragehê Mîyanneteweyî yê Qral Xalidî ame kerdiş; hêriş de 12 kesî ganê xo ra bîyî û 309 kesî birîndar bîyî. Teyarageh paytextê Erebîstanê Siûdî Rîyad de yo.
Husîyan (Ensarullah) Teyaragehê Mîyanneteweyî yê Qral Xalidî bi fuzeyan kerd hedef. Dezgehê Pêroyî yê Teyareyîya Sivîle ya Erebîstanê Siûdî (GACA) bi eşkerayîyêk da zanayîş ke hêriş de 12 kesî ganê xo ra bîyî û 309 kesî birîndar bîyî.
Qurbanan ra 4 hemwelatijê Erebîstanê Siûdî, 2 zî hemwelatijê Bangladeşî yê; ê bînî zî hemwelatijê DYA, Misir, Urdun, Sûrîye, Filistîn û Sûdanî yê. Ame dîyarkerdiş ke rewşa tayê birîndaran giran a û tedawîya înan nêweşxaneyan de dewam kena.
Badê hêrişî teyarageh de firrayîşî demkî ameyî vindarnayîş; zaf firrayîşî ameyî betalkerdiş yan zî ameyî erşawitiş teyaragehanê bînan. Ame dîyarkerdiş ke teyarageh de zerarê madîyî virazîyayê û xebatê tesbîtkerdişê zerarî dewam kenê.
Ganî bêro vatiş ke nê hewte de vera eynî teyarageh di hêrişî zî ameybî kerdiş. Nê hêrişan de 4 kesî ganê xo ra bîbî û teyareyêk seyahetî ke pîst ser o bîye, giran xirab bîbî.
