Dikandaranê Sîteya Komirrotişan û hemwelatijan dîyar kerd ke meaşê teqawudan û meaşo tewr kêmî seba herînayîşê yew tonê komirî bes nêkeno. Goreyê înan zimistano ke yeno, do zaf zehmet bivîyaro.
Wan de şertê zimistanî zaf giran ê û bi nêzdîbîyayîşê aşmanê serdan reyde hewcedarîya komir û kolî zêde bena. Semedê krîz û tehlukeyê Deryaya Sîyaye, Şerê Rûsya-Ukrayna, çinbîyayîşê komirê teberî û vêşêrbîyayîşê neqlîyatî, fîyatê komirî goreyê serra vîyarta se ra 90 zêde bîyo. Nika tonê komirî 20-24 hezar lîreyî yo û meaşo tewr kêm seba yew tonî bes nêkeno. Dikandar û hemwelatijan zehmetîya xo bi rayîrê ajansê ma îfade kerd.
‘Seba astenganê Deryaya Sîyaye komir nêyeno, emser şar do biqerisîyo’
Wayîrê depoyê komirî Hasan Seyhanî dîyar kerd ke 1990î ra nat na sîte de dikandarî keno û wina vat: “Serra vîyarta destpêke sezonî de tonê komirî 12 hezar lîre bî, peynî de bi 14 hezar lîre. Emser destpêke de 15 hezar lîre bî, nika bîyo 20 hezar lîre. Sebebo bingeyîn padîyayîşê rayîrê Deryaya Sîyaye û bombebaranê gemîyanê komirî yê Rûsya yo. Tena na aşme de 130 dolarî zam ame tonê komirî. Yew teqawud 23 hezar TL meaş gêno, tonê komirî zî 20 hezar TL yo. Ma êdî şerm kenê ke fîyatî hemwelatijan rê vajê. Ganî berpirsîyarî seba emnîyetê keştîyan Rûsya reyde dîyalog bikerê; eke ney, no zimistan şar do biqerisîyo.”
‘Beno ke diwês aşman de tonê komirî bibo 33 hezar lîre’
Dikandar Fehîm Yakutî bale ante ferqê fîyatan ê mîyanê di serran ser o: “Emser tonê komirî de 10 hezar lîre ferq virazîyayo. Cinsê portoqalî yo rind ewro bîyo 23-24 hezar lîre. Serra vîyarta ma bi taksîtan dayêne hemwelatijan, la ewro no mumkun nîyo. Eke na rewşe wina dewam bikero, diwês aşman de tonê komirî do bireso 32-33 hezar lîreyan.” Dikandar Bayram Magatî zî dîyar kerd ke par ra heta emser se ra 90 zam ame komirî: “Bar, cayanê durî yê sey Îstanbul, Trabzon û Îskenderûnî ra heta yeno Wan, fîyatê neqlîyatî zî ser o zêde beno. Hêzê herînayîşê şarî nêmendo.”
‘Seba yew keyeyî tewr kêmî 100 hezar TL butçe lazim a’
Hemwelatij Sefer Tunçî dîyar kerd ke yew keye no zimistan seba germkerdişê keyeyê xo do tewr kêm 100 hezar lîreyî xerc bikero: “Kesêko ke meaşo tewr kêm (28 hezar TL) gêno do senî tonê komirî bi 20 hezar lîreyî biherîno û debara xo bikero? Merkezê bajarî bi gazê xozayî germ beno la dorûverê Wanî û qezayî gaz ra bêpar ê. Komiro ke dewlete sey yardimî dana zî sey kerran o, nêveşeno. Eke hurendîya ci de pere bidêne, şarî bi xo komirêko hîna rind herînayêne.”
‘Rotişê kolî û komirî goreyê serranê vîyarteyan zaf kêmî bîyo’
Xebatkarê Sîteya Komirrotişan Cemîl Akayî behsê fîyatanê kolî û çinbîyayîşê taksîtan kerd: “Komirê kalîteya verêne nêzdîyê 20 hezar, yê kalîteya dîyine zî 17 hezar lîreyî yo. Fîyatê kolî serra vîyarta nêzdîyê 7 hezar TL bî, emser bîyo 11 hezar TL. Rotişê ma goreyê serra vîyarta zaf kêmî bîyo. Teqawudî nêeşkenê bi na rewşe cuya xo dewam bikerê; ganî bi lezabez seba fîyatanê mazot û komirî çareserîyêk bêro dîyayîş.”
