Koordînasyonê Kongra Star serrgêra 28. yê komplo yê vera Rayberê Şarê Kurdan Abdullah Ocalanî de dîyar kerd ke amancê komployî nêame ca û îradeyê şarî nêşikîya. Koordînasyonî vengdayîşê wayîrvejîyayîşê aştîye kerd.
Koordînasyonê Kongra Star serrgêra 28. yê komployê mîyanneteweyî ser o eşkerayîyêk daye. No komplo 9ê teşrîna verêna 1998î de vera Rayberê Şarê Kurdî Abdullah Ocalanî ame kerdene. Koordînasyonî komplo bi hawayêko huşk şermezar kerd.
Eşkerayîye de hêzê mîyanneteweyî û herêmkî ameyî mehkûmkerdene; nê hêzan komplo plan kerd û ca ard. Goreyê eşkerayîye, komployî tena Rayber Apo hedef nêgirewt. Komplo vera îradeyê azadîya şarê kurdî, têkoşînê azadîya cinîyanê kurdan û cigêrayîşê şaranê Rojhelatê Mîyanênî yê seba îstîqbalêkê demokratîkî bî. Eşkerayîye de wina ame vatene: “Ma nê sîyasetî qebul nêkenê ke îradeyê azadîya şaran hedef gênê şerî xorîn kenê û rayîrê çareserîya demokratîke ya meseleya kurdan genê.”
Eşkerayîye de ame dîyarkerdiş ke amancê komployî nêame ca: “Komployî ser o 28 serrî vîyartî. La nê demî de îradeyê azadîya şarê kurdî nêşikîya; hîna xurt bî.” Eşkerayîye de xoverdayoxî zî ameyî vîrardene ke çarçewaya çalakîyanê “Şima nêeşkenê Roja ma tarî bikerê” de bedenê xo vêşnabî. Koordînasyonî Rayber Apo rê zî silam erşawit; Rayber Apoyî bi xoverdayîşê xo yo bêemsal komployê 9ê teşrîna verêne bêencam verda.
Goreyê eşkerayîye, amancanê bingeyênan ê komployî ra yew o bî ke îradeyê azadîya şarê kurdî û taybetî yê cinîyanê kurdan meydan ra wedarnê. 28 serranê vîyartan de çar parçeyê Kurdîstanî û Rojhelatê Mîyanênî de şer, pêkewtiş, îşxalkerdiş û wêranîyê gird bîyî; bi milyonan merdiman cayê xo caverdayî û xeylî kesî cuya xo ra bîyî. Ewro zî şeran reyde wêranîya ekolojîke, vêşanîye, sirgun, feqîrîye û şîdetê vera cinîyan sewîyeya dinya de zêde benê.
Koordînasyonî bale ante na ser o ke Rayber Apoyî vera nê krîzî paradîgmayêka demokratîk, ekolojîk û azadîwaza cinîye aver berde. Goreyê eşkerayîye, no perspektîf azadîya cinîye sey bingeyê azadîya komelî vîneno û vera sîyasetê şer û serdestîye alternatîfêko demokratîk pêşkêş kenao. Cehdê awankerdişê cuyêka hempare yê Rojawanî zî nê perspektîfî mojneno. Eşkerayîye de ame vatene ke serkewtişê Prosesê Aştîye û Komelê Demokratîkî seba qedênayîşê şeran û garantîkerdişê azadîya cinîyan firsendêko gird o. Koordînasyonî wina vat: “Ganî rolê Rayberê ma proses de bibo qerardar û heme şertê azadîya ey bêrê caariş. Ma venga heme aştîwazan danê ke wayîrê Prosesê Aştîye û Komelê Demokratîkî vejîyê û îradeyê çareserîya demokratîk xurt bikerê.”
