Wan – Du xwişk Seda Acar (Amara Zîlan Ararat) û Kubra Acar (Amara Zîlan) li pey hev ji bo azadî û parastina hebûna gelê Kurd berê xwe didin çiyayên Kurdistanê. Dê û bavên her du xwişkan dixwazin cenaze û gorên keçên xwe peyda bikin û alîkariyê dixwazin.
Kubra Acar (Amara Zîlan) û Seda Acar (Amara Zîlan Ararat) xwişkên hev in û di sala 2014-2015an de tev li refên Têkoşîna Azadiya Kurdistanê dibin. Kubra Acar di 5ê Cotmeha 2016an de li navçeya Çêlê ye ya Colemêrge di pevçûnekê de jiyana xwe ji dest dide. Seda Acar ku koda wê ya ewil Ezda Ararat bû, piştî şehadeta xwişk û rêhevala xwe navê wê li xwe dike û li ser navê wê têkoşîna xwe didomîne. Di demeke kin a piştî şehadeta Kubra Acar de Seda Acar jî li herêma Barzanê ya Başûrê Kurdistanê di êrişên hewayî de jiyana xwe ji dest dide. Malbat ev bi salan e ji bo cenaze û gorên zarokên xwe bibînin têdikoşin, lê hê jî cihê goristan û cenazeyên wan nayê zanîn.
Dê û bav Îpek û Seyîtxan Acar bi rêya ajansa me banga derxistina holê ya cenaze û gorên keçên xwe kirin.
‘Miroveke qencîxwaz bû’
Dayik Îpek Acar anî ziman ku wê di nav belengazî û xizaniyê de 5 keç û 2 kurên xwe mezin kiriye û wiha got: “Ji ber ku karê xwe yê rojane dikir, min qet bawer nedikir ku wê Seda tev li bibe. Gelek alîkariya malê û me dikir. Qencîxwaz bû, ji mirovan hez dikir û digot ‘dayê keledoşê çêbike, bila mamosteyê min bêne mêvandariyê keledoşê bixwin’. Sedayê gelek sevalan jî hez dikir û dema ew tev li dibe, pisîka wê jî ji mal der dikeve û êdî venagere.”
‘Piştî şehadeta xwişka xwe navê wê li xwe dike’
Îpek Acar destnîşan kir ku her du xwişkan jî gelek ji hev hez dikirin û her tim li ba hev bûn û her tiştên xwe bi hev re bikar dianîn. Îpek Acar diyar kir ku dema Kubra Acar tev li dibe nîşankirî bûye û ev tişt anî ziman: “Dema Seda tev li bû her tişt ber çavên Zîlan Araratê reş bû û bi veşartî amadekariyên xwe yên tevlibûnê kir, me nedizanî. Pêşiyê me agahiya şehadeta Amara Zîlan girt û piştî şehadeta Amara Zilan. Seda navê xwişka xwe girt û kir Amara Zîlan Ararat. Şehadeta Amara Zîlan jî ewilî bavê wê bihîst, salek piştre min li ser televîzyonê şehadeta Seda dît û wê çaxê min fehm kir ku navê xwişka xwe hildaye. Piştî çûna wan, me tu agahî ji wan negirt.”
‘Daxwaza wan dîtina çiyayên Kurdistanê bû’
Bav Seyîtxan Acar serbilindiya xwe anî ziman ku teşegirtina zarokên wî yên welatparêz ji bo wî dibe şanaziyek. Seyîtxan Acar destnîşan kir ku di dilê Amara Zîlan û Ezda Araratê de her tim dîtina çiyayên Kurdistanê û rêhevaltiya Rêberê Gelê Kurd Abdullah Ocalan hebû ye û wiha axivî: “Di xebatên partiyê yên navçe û bajaran de jî cih digirtin. Dema Ezda tev li dibe notekê ji mamosteyê xwe yê dibistanê re dihêle û dibêje ku ‘heke ez di bin ala Tirkiyeyê de bijîm, ez ê di bin ala Kurdistanê de şehîd bikevim’. Daxwaz û xeyalên wan çiyayên Kurdistanê û dîtina Rêbertî bû. Biryar biryara wan bû. Dibe ku çûna wan em xemgîn kiribin, lê bi hezaran zarokên Kurdan li çiyayên Kurdistanê ne, dayik û bavên wan jî hene; me ew anî ber çavên xwe.”
Negihiştine cenazeyên keçên xwe
Di berdewamiya axaftina xwe de Seyîtxan Acar destnîşan kir ku ew ne cihê gorên keçên xwe zanin ne jî cenazeyê wan dîtinê û wiha pê de çû: “Di çapemeniyê de me dît ku hevala Amara Zîlan ku navê wê yê malbatî Kubra Acar e, şehîd ketiye. Piştre gotin cenaze di destê hevalan de ye, lewma dilê me rihet bû. Lê cenazeyên her du keçên min jî nediyar in. Dayika wan çû serî li walîtiyê û dozgeriya Colemêrgê da ku agahiyekê li ser cenazeya Amara Zîlan bigire; wan tu agahî nedan û ji dayikê re gotibûn ‘rast e, belê divê tu biçî qada ku şer lê qewimiye cenazeyê keça xwe û pê re jî cenazeyên leşkeran bînî’. Dayikê jî gotibû ez qebûl dikim lê divê hûn destûreke fermî bidin min da ku ez bikarim hemûyan jî bînim.”
‘Alikariya me bikin ku em gorên zarokên xwe bibînin’
Her wiha Seyîtxan Acar daxwaza alikariya dîtina cenazeyên keçên xwe kir û wiha di dawî li axaftina xwe anî: “Me testa xwe ya DNAyê jî da ku heke di destê dewletê de be, cenazeyên me bidin me. Xwediyên wan şehîdan hene û malbatên wan hene. Kurdên bişeref, birûmet, biwijdan ku şopa wan bi dil û can nas kiribin, ew şehîd şehîdên wan in. Banga min ji sazî û dezgehan re ye; cenazeyên me li ku derê bin, Başûr, Bakur di kîjan goristanê de bin em dixwazin peyda bikin. Hûn jî alîkariya me bikin û bila gorên keçên min bên diyarkirin. Daxwaza me ew e ku qet nebe ew agirê di dilê me de piçekê kêm bibe. Em alîkariya hevalên xwe û saziyên xwe dixwazin.”
