Aşma tebaxe ra nat Îstanbul de seba şehîdanê Têgêrayîşê Azadîya Kurdî programê yadkerdişî yenê viraştene. programo peyên ewro qezaya Gazîosmanpaşa de ame viraştene.
Bi pêşengîya MEBYA-DER’î 23ê tebaxe ra nat seba endamanê Têgêrayîşê Azadîya Kurdîstanî yê ke ca û tarîxanê cîyayan de cuya xo vîndî kerda, programê vîrardişî yenê viraştene. Bi hezaran kesî tewrê programê vîrardene bîyî. programo peyên qezaya Gazîosmanpaşa taxa Karayollarî de ameye viraştene. Keyeyê şehîdan, Dayîkê Aştîye, aktîvîstê TJAyî, endam û îdarekarê partîyanê sîyasîyan, temsîlkarê dezgehanê komelê sîvîlî û zaf welatîyî tewrê programê yadkerdişî bîyî. Salona yadkerdişî de serê masayan ke fotografê şehîdan, Rayberê Şarê Kurdî Abdullah Ocalanî bîbî qerenfîlî ameyî ronayene. Salone de pankartê “Ma şehîdanê rûmetî yad kenê”, “Şehîdê ma rûmetê ma yê”, “Têkoşîna înan rayîrê ma roşn kena” û “Şehîdî Nêmirenê” ameyî daliqnayene. Program seba şehîdan bi deqeyêk rêzgirewtiş dest pêkerd.
‘Ma do rayîrê şehîdan de şêrê’
Badê rêzgirewtişî Nedîm Yilmaz o ke dima 33 serranê hepisxaneyî ra ameyo verdayene qisey kerd û ard ziwan wa sereyê şarê Kurdîstanî û Rayberê Şarê Kurdî Abdullah Ocalanî weş bo û wina vat: “Şehîdan yew qewl da şehîdan. No qewl bî cuya înan. Şehîdan vat; ma do cuyêka azade biciwîyê. Ma do zî seba şehîdan cuyêka azade biafernê. Ganî ma cayê ke tede yê de mîyanê merdiman û komelî de cuyêka azade awan bikerê. Ma do rayîrê şehîdan de şêrê.”
Dima qiseykerdişan, sînevîzyono ke behsê têkoşîna cangorîyan kerdêne ame temaşekerdene û program bi wendişê mewlûdî dewam kerd.
