Îstanbul de bi pêşengîya MEBYA-DER’î seba pêro şehîdanê têgêrayîşê azadîye yê Îstanbulî programê vîrardişî yeno viraştene.
Bi pêşengîya MEBYA-DER’î ya Îstanbulî, seba endamanê Têgêrayîşê Azadîye yê Kurdîstanî ke ca û tarîxanê cîyayan de cuya xo vîndî kerda, Salona Labella ya Okmeydanê Îstanbulî de programê vîrardişî yeno viraştene. Keyeyê şehîdan, parlamenterê DEM Partî, Dayîkê Aştî, aktîvîstê TJA’yî, endam û îdarekarê partîyanê sîyasîyan, temsîlkarê dezgehanê komelê sîvîlî û bi hezaran hemwelatijî tewrê programê vîrardişî benê.
Hemwelatijî ke tewrê vîrardişî benê, fotografê şehîdan silam kenê û wina derbazê cayê vîrardişî benê. Salona vîrardişî de maseyan ser o fotografê şehîdan û Rayberê Şarê Kurdî Abdullah Ocalanî û qerenfîlî ameyî ronayene. Salone de pankartê “Ma şehîdanê rûmetî vîr anê”, “Şehîdê ma rûmetê ma yê”, “Têkoşînê înan rayîrê ma roşn keno” û “Şehîd Nêmirênê” ameyî daleqnayene.
Programê vîrardişî de sîyasetkar û aktîvîsta TJA’yî Sebahat Tuncel, parlamenterê DEM Partî Cengîz Çîçek û keyeyê şehîdan do qisey bikerê.
