Amed – Endamê rêyberîya MEBYA-DER’î Şehmus Karadagî da zanayene ke bi hezaran gerîla oxira azadîye de cuya xo feda kerdo û wina vat: “Şehîdê rûmetê nê şarî yê û ganî asta tewr berz de wayîrê vîrardişê înan bêro vejîyayene.”
Çend rojî verê cû Têgêrayîşê Azadîya Kurdîstanî şehadetê gerîlayanê ke tarîx û cayanê cîyayan de cuya xo ra bîyî eşkera kerd û xeylî merkezan de seba cangorîyanê Têgêrayîşê Azadîye vîrardişî ame virazîyayene û hema zî yeno virazîyayene. Bi se hezaran welatijî zîyaretê şînan kerd û wayîrê cangorîyanê xo vejîyayê. La no wayîrvejîyayîşê vîrardişan hetê rayedaranê AKP’yî ra ame hedefgirewtene û badê hedefgirewtene, xeylî kesî bi maneya ke tewrê vîrardişî bîyî, ameyê destbendkerdene. Medyaya dîjîtale ser o zî, kesê ke vera prosesî yê, nêzdîbîyayîşêko nîjadperest vera vîrardişan mojna.
Endamê rêyberîya MEBYA-DER’î Şehmus Karadagî derheqê hêrişanê şehîdanê şarê kurdî ser o ajansê ma rê qiseykerd.
‘Bi her hawayî şarê kurdî wayîrê şehîdanê xo vejîyayo’
Şehmus Karadagî qiseykerdena xo de îfade kerd ke şarê kurdî binê her şertan de wayîrê qîymetanê xo vejîyayo û wina vat: “Babeta wayîrvejîyayîşê cenazeyan de, wexto ke merdim bi hawayêko durist û berpirsîyarîya hetê tarîxî, exlaqî û wijdanî biewnîyo, yeno vînayene ke şarê kurdî xeylî waran de wayîrê qîymetanê xo vejîyayo. Senîn dînya de komel bi hawayêko birûmet wayîrê cenaze û şehîdanê xo vejîyenê, şarê kurdî zî bi eynî hawayî wayîrê şehîdanê xo vejîyayo.”
‘Şarê kurdî bedêlê giranî dayê’
Şehmus Karadagî dîyar kerd ke şarê kurdî rayîrê têkoşînê Têgêrayîşê Azadîye yê kurdî de xeylî bedêlê giranî dayê û vat ke bedêlê tewr giranî zî keyeyê ke gedeyê xo vîndî kerdî dayê û wina domna: “Serrano şarê kurdî nê oxirî de bedêlê giranî dayo, şehîd dayê û bi hawayêko fedakarî nê qîymetî pawito. Taybetî warê rêxistinbîyayîş û sîstemê komelkî de, rixmê heme astengîyan zî keyeyê şehîdan wayîrê nê qîymetan vejîyayî. Keyeyê şehîdan bi kedêka pîle gedeyê xo gird kerdî, nê gedeyan mîyanê şert û mercanê zehmetan de têkoşînêko gird rê pêşengî kerd.”
‘Ganî statuya şehîdan bêro nasnayene’
Tewr peyên Şehmus Karadagî dîyar kerd ke ganî îqtîdar statuya nê şehîdan qebul bikero û wina qiseykerdena xo qedêna: “Ganî îqtîdar û sazgehê têkîlîdar zî na raştîye qebul bikerê. Ganî statuyê şehîdan bêro nasnayene, heqê înan yê qanûnî û exlaqî bêrê pawitene. Şarê Kurdî heqê xo yê nê warî de wazeno û ganî her kes rêz nê qîymetanê pîroz bigêro. Nê şehîdê ke seba azadîye cuya xo feda kerdê, rûmetê nê şarî yê û ganî asta tewr berze de wayîrê vîrardişê înan bêro vejîyayene.”
