Şaristanê Serhedî yê Bêdlîs, Agirî, Mûş û Erzirom de nê 3 rojî seba şehîdanê Têgêrayîşê Azadîya Kurdîstanî yadkerdişî ameyî viraştene. Yadkerdişê şehîdan ewro bi zîyaretanê girseyî û berzkerdişê sloganan qedîya.
Yadkerdişê şehîdanê Têgêrayîşê Azadîya Kurdîstanî yê Qers de, qezaya Tetwanî ya Bêdlîsî de, qezayê Bazîd û Patnosî yê Agirî de, qezayê Qereyazî, Qereçoban, Tatos û Xinûsî yê Erziromî de bi programanê pêroyî yê yadkerdişî qedîyayî. Yadkerdişan de fotografê şehîdan û fotografê Rayberê Şarê Kurdî Abdullah Ocalanî ameyî ronayene. Heto bîn ra yadkerdişo ke Mûş de yo zî roja xo ya diyîne de dewam keno.
Bedlîs
Yadkerdişê şehîdanê Têgêrayîşê Azadîya Kurdîstanî Salona Veyve ya Gokte Adana yê qezaya Tetwanî ya Bêdlîsî de bi yew programê pêroyî yê yadkerdişî qedîya. Keyeyê merdimanê ke cuya xo vîndî kerda, temsîlkarê partîyanê sîyasî û sazgehanê sivîlan û zaf welatijî tewrê yadkerdişî bîyî. Fotografê kesê ke cuya xo vîndî kerda maseyanê ke bi renganê kesk, sûr û zerd xemilîyabî ser o ameyî ronayene. Zîyaretanê girseyî yê yadkerdişî de ke dima rêzgirewtişî dest pêkerd, zaf reyî sloganê “Şehîdî nêmirenê” ameyê berzkerdene. Programê yadkerdişî bi wendişê mewlûdî û mojnayîşê sînevîzyonî qedîya.
Agirî
Qezayê Bazîd û Patnosî yê Agirî de programê yadkerdişî yê 3 rojan ê seba kesê ke têkoşînê azadîye de cuya xo vîndî kerda qedîya. Yadkerdişo ke Bazîd de Keyeyê Şînî yê Hacî Arasî de û Patnos de zî Keyeyê Şînî yê Qebristanî de ame viraştene, hîrê rojî hetê hezaran kesan ra ame zîyaretkerdene.
Hîrê salonê ke welatijî tewrê vîrardişî bîyê zafê înan cinîyî û ciwanî bî, fotografê şehîdanê ke cuya xo vîndî kerda ameyê ronayene. Postera Rayberê Şarê Kurdî Abdullah Ocalanî û pankartê “Şehîdî Nêmirenê” ame daleqnayene. Welatijî ke ameyê vîrardiş, keyeyan rê serweşî waşte û piştdayîşê xo mojna. Roja peyêne ya yadkerdişî de zî seba gerîlayanê ke cuya xo vîndî kerda yew program ame viraştene. Her di programî de bi rêzgirewtişî dest pêkerdî û sînevîzyono ke behsê têkoşîn û cuya gerîlayanê ke cuya xo vîndî kerda, keno ame mojnayene. Programê yadkerdişî yo ke hîrê rojî dewam kerd, bi sloganê “Şehîdî nêmirenê” û “Biciwîyo Serek Apo” qedîya.
Erzirom
Bi rayeberîya MEBYA-DER’î, seba merdimanê ke tarîxanê cîyayan de têkoşînê azadîya kurdî de cuya xo vîndî kerda qezaya Qereyazî ya Erziromî de programê yadkerdişî yo pêroyî virazîya. Programê yadkerdişî badê rêzgirewtişê seba kesê ke têkoşînê azadîye de cuya xo vîndî kerda dest pêkerd. Ciwanî bi slogananê “Biciwîyo Serek Apo” û “Şehîdî nêmerenê” tewrê programî bîyî. programê yadkerdişî badê mojnayîşê sînevîzyonî, bi duayan û wendişê mewlûdî qedîya.
Qers
Qers de, yadkerdişo ke seba kesê ke têkoşînê azadîya de tarîx û cayanê cîyayan de cuya xo vîndî kerda ame viraştene, roja xo ya peyêne de saetanê serê sibayî de bi sloganan dest pêkerd. Keyeyê gerîlayanê ke cuya xo vîndî kerda, Parlamenterê DEM Partî, temsîlkarê partîyanê sîyasîy û rêxistinanê sivîlan û zaf welatîyî tewrê yadkerdişê ke awanîya DEM Partî ya Qersî de ameyene viraştene bîyî. Salona ke yadkerdiş tede ame viraştene de, fotografê merdimanê ke cuya xo vîndî kerda, posterê Rayberê Şarê Kurdî Abdullah Ocalanî û pankartê “Şehîdî nêmirenê” ameyê daleqnayenê. Yadkerdişo ke bi rêzgirewtiş dest pêkerd de, zaf reyî sloganê “Şehîdî nêmirenê” û “Biciwîyo Serek Apo” ame berzkerdene.
‘Ma do beyreqê şehîdanê xo erd de nêverdê’
Hewsereka DEM Partî ya Qersî Arzu Savaş Dermane ke yadkerdiş de qisey kerd, wina vat: “Yadkerdişê merdimanê ke têkoşînê azadîye de cuya xo vîndî kerda, no tena yadkerdişê vîrî nîyo. Pîlkerdiş û pawitişê nê erjanê ke şehîdan semedê înan têkoşîn dayo, ma rê zaf muhîm o. Lazim o ke ma yew komelî wina awan bikerê ke vera yewbînî nê, pîya azad bo. Ganî ma dejê xo bivurnê hêvîyêka rêxistinkerdeye. Vera şer û pêkewtişan ma do aştîya birûmete, vera înkarî têduştî û vera yewperestî zî cuya pîyaye ya şaran bipawê. Ma do ameyexo ke demokratîk û azad awan bikerê. Rayîro ke şehîdanê ma akerdo, eke ma pîya kişta yewbînî de vindere, ma eşkenê ameyoxêko demokratîk û azad awan bikerê. Ma tîya de reyna soz danê; Ma do beyreqa şehîdanê xo erd de nêverdê. Bi rayberîya înan, bi sîyasetê demokratîk û têkoşînê pîya yê şaran reyde, ma do cuyêka birûmete û azade awan bikerê.” Yadkerdiş, bi mojnayîşê sînevîzyonî qedîya.
Mûş
Bi rayeberîya MEBYA-DER’î, programê yadkerdişî yo ke seba kesê ke tarîxanê cîyayan de têkoşînê azadîya Kurdî de cuya xo vîndî kerda Merkezê Mûşî û qezayanê Gimgim, Qop û Milazgird de ame organîzekerdene, roja xo ya diyîne de dewam kerd. Yadkerdişan de seba merdimanê ke têkoşînê azadîye de cuya xo vîndî kerda deqayêk rêz ame girewtene. Salona ke yadkerdişî de, posterê Rayberê Şarê Kurdî Abdullah Ocalanî û pankartê bi nuşteyê “Şehîdê ma rûmetê ma yê” ameyê daleqnayene. Yadkerdişan de fotografê merdimanê ke cuya xo vîndî kerda serê maseyan de ame ronayene û welatîyê ke tewrê yadkerdişî bîyî qerenfîlî verê fotografan de ronayê. Programê yadkerdişî yê Mûşî do siba bi yadkerdişê komî û mewlûdî qezaya Milazgirdî biqedîyo.
