Îzmîr – Dayîkî, merdimî û kesê ke Îzmîr de tewrê vîrardişê şehîdanê Têgêrayîşê Azadîye ya Kurdîstanî bîyê dîyar kerd ke seba çareserîyêk demokratîk û aştîyêk bi rûmetê ganî waştişê şehîdan nêrê vîrkerdene.
Qezaya Bûca ya Îzmîrî de bi pêşengîya EGE MEBYA-DER’î de seba şehîdanê Têgêrayîşê Azadîye ya Kurdîstanî Komeleya Paştîdayîşî ya Pasûrijan ê taxa Çamlikule de programê vîrardişê ke hîrê rojan dewam bikero ame viraştene.
Dayîka Aştîye Peyrûze Kurt, girewteyo ke badê 30 serran ameyo veradayene û Mamostayê kurdkî yê Komeleya Avesta ya Cigêrayîşê Kultur û Ziwanî Çeçan Topçû, Dayîka Aştîye Mîhrînaz Merhan, Waya şehîdî Sevîm Okmen û Endamê EGE MEDYA-DER’î Mehmet Bayram ewnayîş û hîsê xo ê derheqê programê vîrardişan de ajansê ma rê pare kerd.
‘Herra Kurdîstanî û Tirkîya mirdê xo gonî şimita’
Endama Meclîsê Dayîkanê Aştî yê Îzmîrî Peyrûze Kurt ard ziwan ke zerrîya mayan ne rayek bi desan reyan veşaya û dîyar kerd ke aye bi xo zî maya di şehîdan a ke heta nika zî nêresaya cenazayanê xo û vengdayîşê bihêzkerdişê Prosesê Aştî û Komelê Demokratîkî kerd û vat: “Sereyê şarê kurdî, Serekî û hemrayîran ê înan weş bo. Ma vanê êdî şîn û bermayîş bes o. Ma naye ra teber çîyêk nêwazenê. Êndî herra Kurdîstanî û metropolanê Tirkîya mirdê xo gonî şimita. Ma hete ke ra xemgînê la heto bîn ra zî seba prosesê aştî keyfweş ê. Ma dewa azadî, aştî û têduştîya şarê kurdî û tirkî yê birûmetê kenê.”
‘Çîyê ke hêz danê têkoşînê ma şehîd ê’
Girewteyo ke badê 30 serran ameyo veradayene û mamostayê kurdkî ê Komeleya Avesta ya Cigêrayîşanê Kultur û Ziwanî Çeçan Topçu zî dîyar kerd ke eke ewro kurdî eşkenê dewlete reyde ronişê, muzakere bikerê, qalê aştî, sîyaset û demokrasî bikerê, no bi sayeya şehîdan o û vat. “Verê her çî ma vanê têgêrayîşê ma têgêrayîşê şehîdan o. Çîyê ke hêz danê têkoşînê ma şehîdan ê, cuya înan a, vîrardişê înan o. Ganî ma bivîrardişê înan biciwîyê û manewîyatê înan hîs bikerê . Çîyê ke hêz dano ma, tena waştişê welatêko azad û têduştî komelî yo; no zî eynî wextî de vîrardiş û girêdayeyê şehîdan o. Çîyê ke ma lingan ser o gêno no yo.”
‘Êdî dorê serkeftişî yo’
Dayîka Aştiye Mîhrînaz Merhan zî bale ante serê bedêlanê giranan ê ke ameyê dayene û ard ziwan ke lajê aye bî 35 serrî şîyo û 27 serrî yo şehîd bîyo û vat: “Xeylî gonî rijîya. Ma nêwazenê gonî birijîyo. Wa Serekî û no şar weş bo. Êdî dorê serkewtişî yo, ma do serbikewê.”
‘Ganî waştişê şehîdan nêrê vîrkerdene’
Waya şehîdî Sevîm Okmen ard ziwan ke aye nêwaşta şehadetê birayê xo ra bawer bikera, a û maya aye pawebî ke rojêke agêro û wina vat: “Şehîdî ameyoxê ma yê, înan ma ardê na merhela. Eke şehîdî çinîbînê ewro ma nêeşkayene biameyene têhet yan zî ziwanê xo qisey bikerdêne. Vengdayîşê mi serekanê kurdan rê nayo ke ma aştîyêka têduştî wazenê, aştîyêka tena seba goreyê hetê ke nêwazenê. Ma ziwan û kulturê xo wazenê. Ma aştî wazenê la ganî waştişê şehîdan nêrê vîrkerdene.”
‘Prosesê aştî bingey o’
Endamê EGE MEBYA-DER’î Mehmet Bayram zî vengdayîşê yewîya çar hetanê Kurdîstanî kerd û dîyar kerd ke azadî bi yewîye mumkun a û erjnayîşê xo yê prosesî ser o de wina vat: “Wexto ke qalê prosesê aştî yeno kerdene ge-ge şenik yeno erjnayene, la ez nê prosesî bingeyê her çîyî vînena. Bi seserran o gonîya ma yena rijnayene û ma estbîyayîşê ra xo dûrî kewtbî. Nê prosesê Aştî û Komelê Demokratîkî de bawerîya mi naya ke ma do bi temamî biresê estbîyayîşê xo. Beno ke ma zehmetîyan biancê la çîyêko bingeyê ew hetê Serekî ra ameya ronayene do bi ca bêro.”
