Seba Gerîlayanê Azadîya Kurdîstanî yê ke tarîxanê cîyayan de şehîd bîyî, zaf bajaran de tazîye û yadkerdişî yenê viraştene.
Yadkerdişê ke seba şehîdanê têkoşînê azadîya kurdan bajaranê cîyayan de yenê viraştene, dewam kenê; zaf bajaran de gerîlayê HPG/YJA Starî ameyî vîrardene û keye û nêzdîyanê înan rê serweşî ameye waştene.
Mersîn
Mersîn de yadkerdiş bi pêşengîya MEBYA-DERî Keyeyê Tazîye yê Guneşî yê qezaya Akdenîzî de ame viraştene. Keyeyê tazîye de pankartê “Şehîdên me rûmeta me ne”, “Em şehîdên azadiyê bi bîr tînin” û “Şehîd namirin” ameyî aliqnayene; masayan de beyraqê zerd, sûr û keskî, fotografê şehîdan û Rayber Apoyî û qerenfîlê sûrî ameyî ronayene. Yadkerdiş bi dekewtişê keyeyanê şehîdan ê salone bi slogana “Şehîd namirin” dest pêkerd.
Adana
Adana de zî bi pêşengîya AKKAY-DERî Keyeyê Tazîye yê Ova yê qezaya Seyhanî de yadkerdiş ame viraştene. Warê yadkerdişî de pankartan ra teber postero gird ê Rayber Apoyî ame aliqnayene; badê rêzgirewtişî beşdaran keyeyî zîyaret kerdî û serweşî waşte.
Hatay
Qezaya Dortyolê Hatayî de zî seba Hesen Bindalî (Edîp Sirça) keyeyê ci de tazîye ameye ronayene; keye û nêzdîyê Bindalî û temsîlkarê partîyanê sîyasî û rêxistinanê komelê sîvîlî beşdar bîyî. Yeno pawitene ke yadkerdişî rojanê ameyoxan de zî bajaranê cîyayan de dewam bikerê.
Sêrt
Sêrt de bi pêşengîya MEBYA-DERî bernameyê vîrardene amê kerdene. Salona ke vîrardene tede amê kerdene de pankartê “Tekoşînê înan raya ma ronî kena”, “Ma deyndarê şehîdanê xo yê, şehîdê ma rumetê ma yê ” û posterê Rayberê şarê Kurd Abdullah Ocalanî û gerîlayanê şehîdan amê aliqnayene. Vîrardene bi rêzgirewtene û wendena marşê Çerxa Şoreşî dest kerd ci.
Zaf rayan sloganê “Şehîd namirin” û “Bijî Serok Apo” amêyî eştene.
Hemserekê Partîya Herêman ê Demokratîkî (DBP) Keskin Bayindir zî beşdarê vîrardene bî. Bayindirî seba keyeyan sereweşî waşt û wina vat: “Sereyê şehîdanê ma û mayanê înan hetê ma de qasê koyanê Kurdîstanî berz o. Têkoşînê şehîdanê ma raya ma roşn keno. Ma înan rê minetar ê.”
Êlih
Rayberîya MEBYA-DERî de seba gerîlayanê HPG/YJA Starî yê ke şehîd bîyê Êlih de vîrardena ke amêne kerdene, roja xo ya peyêne de bi beşdarîya hezaran dewam kena. Saetanê sibayî de salona Tawûsê Pazaryerî ya ke tezayîye yena kerdene de posterê Rayber Ocalanî û şehîdanê azadîye ame aliqnayene. Bin3e pankartanê “Şehîdê ma sebebê cuya ma yê” û “Cevherê cuya ma şehîdê ma yê” de vîrardene roja xo ya peyêne de zî ziyareten dewam keno. 
Bernameyê vîrardene dima mewlid û nîşandayena sînevizyonî ra do biqedîyo.
Amed
Qezaya Rezanî (Bağlar) ya Amedî de bi pêşengîya Komelemeyê MEBYA-DERî seba şehîdanê têkoşînê azadîye vîrardene amê kerdene. Bê keyeyanê şehîdan, temsîlkarê partîyanê, dezgehanê komelkî yê sivîlan û sedan kesî beşdar bîyî. Salone de posterêko pîl ê Rayber Apoyî û pankartê “Şehîd namirin” amê akerdene û resmê şehîdan masayan ser de amê ronayene. Hetê resman de gulî ameyê ronayene. Beşdaran zaf rayan sloganê “Şehîd namirin” û “Bijî Serok Apo” yî berz kerdî.
Vîrardene bi rêzgirewtene dest kerd ci, marşê “Çerxa Şoreşê” amê wendene û sloganê “Şehîd namirin” amê eştene. Vîrardene do 3 rojî dewam bikero.
Bismil
Bi pêşengîya MEBYA-DERî, gerîlayê ke têkoşînê azadîye de tarix û cayanê cîyayan de şehîd bîyê seba înan qezaya Bismilî ya Amedî de bernameyê vîrardene yo ke do hîrê rojî biramo dest kerd ci.
Xana Axpar
Qezaya Xana Axparî (Çinar) ya Amedî de zî bi pêşengîya MEBYA-DERî seba gerîlayanê HPG/YJA Starî vîrardena ke yena kerdene roja xo ya 2’yine de ya.
Farqîn
Qezaya Farqînî de bi pêşengîya MEBYA-DERî seba gerîlayanê HPG/YJA Starî yê şehîdan Bane Tazîye yê Mehmet Emin Karakuşî de vîrardene amê organîzekerdene. Beşdariya keyeyanê şehîdan, temsîlkaranê partîyanê polîtîkan û dezgehanê komelkî yê sivîlan û zaf welatparêzan amê kerdene.
Erxenî
Seba şehîdanê Gerîlayê Azadîya Kurdistanî qezaya Erxenî de zî vîrardene amê kerdene. Banê Tazîye yê Beledîye yo ke rayîrê Çermûgî ser de yo de vîrardene amê kerdene û dewanê deşt û merkezê qezaye de zaf merdimî beşdar bîyî. Salona ke fotografê şehîdan amê alaqayene de slogana “Şehîd namirin” amê eştene. Vîrardene do 3 rojî biramo.
Dîlok
Bi pêşengîya MEBYA-DERî, seba şehîdanê têkoşînê azadîye Dîlok de bernameyê vîrardene dest kerd ci. Seba vîrardena ke do hîrê rojî biramo çar kinarê şaristanî ra zaf welatijî ameyî pêser.
Wan
Wan de, seba gerîlayanê HPG/YJA Starî yê ke şehîd bîyê bi pêşengîya MEBYA DERî bernameyê vîrardene amê organîzekerdene. Salona vîrardene de masayan ser de resmê şehîdanê têkoşîne azadîye amê ronayene, pankartê “Em şehîdên azadîyê bi bîr tînin”, “Şehîd ronîya rêya me ne” û resmê Rayberê Şarê Kurdî amê aliqnayene.
