Seba vernîgirewtişê teda û kiştişê cinîyan Başûrê Kurdîstanî de, Torê 8ê adare kampanyayêke da destpêkerdene û vengdayîşê piştîdayîşê kampanyaye heme beşanê komelî ra ame kerdene.
Seba vernîgirewtişê teda û kiştişê cinîyan Başûrê Kurdîstanî de, Torê 8ê Adare bi eşkerayîyêka çapemenîye kampanyayêk da destpêkerdene.
Eşkerayîye de wina ame vatene: “Bêrê tewrê ma bibêni, wina ke piştîdayîş bidinê kampanyayêka hîra ya vera teda û kiştişê cinîyan herêmê Kurdîstanî û Kerkûkî de.”
Amanc bi kampanyaye xelisnayîşê cinîyan o
Eşkerayîye de ame dîyarkerdene ke na kampanya hetê Hempeymanîya Cinîyanê Kurdîstanî ra, xeylî rêxistinanê cinîyan, rêxistinanê heqê merdiman û komeleyê sîvîlan ra, bi piştîdayîşê çalakîkeranê zere û teberê herêmê Kurdîstanî ra yena rayraberdene.
Eşkerayîye de sewbîna ame îfadekerdene ke amanc bi na kampanyaye pêroyîyê welatî de têgêrayîşêk bêro afirnayene, ke cinî teda, kiştiş, vêşnayîş û xoşvêşnayîşî ra bêrê xelisnayene û wina vengdayîş ame kerdene: “Ma vengê heme kesanê ke vera kiştiş û xovêşnayîşê cinîyan de yê û bawerîya înan bi seyyewbînîya cinsîyetî est a kenê, ke piştîdayîş bidê kampanyaye.”
