Li Îdirê ji endamên Tevgera Azadiyê yên li cih û dîrokên cuda de jiyana xwe ji dest dane bernameya bîranînê hat lidarxistin û dirûşmên “Şehîd namirin’ hatin berzkirin. Parlamenterê Îdirê Yilmaz Hûn di bîranînê de axivî û got: “Kurd bi saya şehîdan hatin nasîn.”
Komeleya Yekitî, Çand, Piştevanî û Alikariya ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) li Taxa Ozgur ya navenda Îdirê ji bo şehîdên Tevgera Azadiya Kurdistanê bernameya bîranînê li dar xist. Bîranîn li mala şînê ya li taxê hat lidarxistin. Wêneyên şehîdan bi kulîkan hatin xemilandin û li ser maseyan hatin cihkirin. Gelek welatî û nûnerên partiyên siyasî û rêxistinên sivîl ên demokratîk ên bajêr serdana bîranînê dikin.
Bîranîn bi rêzgirtinê ji bo şehîdan û berzkirina dirûşma “Şehîd namirin” dest pê kir.
‘Bi saya şehîdan Kurd hatin naskirin’
Parlamenterê DEM Partiyê yê Îdirê Yilmaz Hûn di bîranînê de axivî û diyar kir ku şehîd di dîroka Kurdan de xwedî cihekî gelek bi qîmet in. Yilmaz Hûn da zanîn ku îro ew şîna kesên ku dîroka Kurdan nivîsandine digirin û wiha got: “Ew ji Îdirê derketin û ji bo çar parçeyên Kurdistanê têkoşiyan. Îro em mîrateya têkoşîna wan didomînin. Sersaxiyê ji me hemûyan û ji malbatan re dixwazim. Beriya pêncî salan, gelê Kurd rastî xetereya tunebûnê bû; ji nasnameya xwe ya Kurdî şerm dikirin. Îro, bi saya şehîdan, Kurdên li çar parçeyên Kurdistanê xwe dane naskirin li cîhanê. Em niha serbilind in. Ev yek bi saya wan pêk hat. Em ê li ser şopa wan bimeşin. Bîranînên wan dê ronahiyê bidin têkoşîna me.”
Bîranîn bi berzkirina dirûşmên “Şehîd namirin” û “Bijî Serok Apo” û serdanan didome.
